«Ja pravasłaŭny». Aleh Hajdukievič prahałasavaŭ za śmiarotnaje pakarańnie i adkazaŭ, što budzie, kali rasstralajuć nievinavataha
U deputata Aleha Hajdukieviča spytali pra «rasstrelnyja papraŭki» ŭ zakonie i zakryćcio biełaruskamoŭnaj kniharni.
Z pytańniami deputatu patelefanavała čytačka «Našaj Nivy». Pryvodzim častku hetaj razmovy.
— Jak vy hałasavali, kali prymaŭsia zakon pra śmiarotnaje pakarańnie za akt teraryzmu?
— Za, kaniečnie, treba rasstrelvać. Jašče bolš žorstka treba! Miakka niejak, na moj pohlad. U Jeŭropie zakanadaŭstva značna bolš žorstkaje, čym u nas (u Jeŭropie niama śmiarotnaha pakarańnia. — «NN»). Musić być viedajecie jak? Voś ja vam skažu: padniaŭ ruku na milicyjaniera — ruki niama. Kali b u 2014 hodzie Janukovič zrabiŭ, jak Łukašenka ŭ 2020-m, razahnaŭ hetych usich miarzotnikaŭ na płoščy, nie było b nijakich hramadzianskich vojn va Ukrainie.
Hałasavaŭ za, usich rasstrelvać nie buduć. Heta nie značyć, što kali ty tolki pra niešta takoje padumaŭ, to buduć rasstrelvać. Pryznačacca heta budzie tolki tym, chto ažyćciaŭlaŭ terakt, a heta budzie dakazvacca.
— Vy kali prymali hety zakon, u kahości z vybarcaŭ zapytalisia, što jany dumajuć na hety kont?
— Tak, viadoma. Amal uvieś rajon, 80%, navat bolš.
— Jakim čynam vy pravodzili apytańnie?
— Pa-pieršaje, pryjomy, pa-druhoje, ciesny kantakt z administracyjaj rajona. Jany ŭvieś čas pravodziać apytańni ludziej. Čamu ŭsie pavinny być za? Vy majecie prava być suprać. Nie zabyvajciesia, što ja deputat, abrany narodam (parłamienckija vybary pravodziacca z falsifikacyjami. — «NN»). Usio, što ja rablu, bolšaść padtrymlivaje, a niechta z vybarščykaŭ — nie. Heta ich prava. U nas ža kraina svabodnaja, demakratyčnaja, jany mohuć na nastupnych vybarach prahałasavać za kahości inšaha.
— Što adbudziecca, kali rasstralajuć nievinavataha? Chto za heta budzie adkazvać?
— Takoha nie byvaje (u biełaruskaj «biespamyłkovaj» sudovaj sistemie mienš za 1% apraŭdalnych prysudaŭ. — «NN»). Vy, napeŭna, vystupajecie za admienu śmiarotnaha pakarańnia?
— Tak.
— Dyskusijnaje pytańnie. Čamu ZŠA nie admianiajuć, Kitaj? Ja liču, što za piedafiliju, naprykład, pavinna być śmiarotnaje pakarańnie. I druhi momant, navat z vami zhadžajučajusia, śmiarotnaje pakarańnie nie zaŭsiody panaceja. Najpierš tut pavinna być vola naroda. Tolki praz refierendum śmiarotnaje pakarańnie možna admianić. Toje, jakoje ŭ nas ciapier jość u krainie, — vola naroda siaredziny 90-ch hadoŭ. Ja pierakanany, što i ciapier znoŭ 80% budzie za śmiarotnaje pakarańnie.
— Usio ž taki, što adbudziecca, kali rasstralajuć nievinavataha?
— Jość prakuratura, jość sud. Nie byvaje ž takoha, što ŭziali i niekaha asudzili (pratakoły i sudy pa palityčnych spravach składajucca i pravodziacca z parušeńniami pracedury, na što nieadnarozova źviartali ŭvahu asudžanyja i pravaabaroncy. — «NN»). Tut cełaja pracedura. I potym nichto ž nie rasstrelvaje adrazu, hadami, naprykład, u Amierycy, ludzi siadziać čakajuć.
— Dźmitryja Kanavałava rasstralali davoli chutka.
— Ja viedaju asabista tych supracoŭnikaŭ, jakija raskryvali heta złačynstva. Jany da palityki nie majuć nijakaha dačynieńnia. Prostyja opiery, hieroi Biełarusi. Jany nie spali načami, nie jeli, nie pili, a raskryvali złačynstva.
— A ciapier jany spakojna śpiać?
— Kaniečnie, spakojna. A što vy ličycie, što Kanavałaŭ nievinavaty? Nijakich navat sumnievaŭ nie moža być.
— A vy viernik?
— Tak, ja pravasłaŭny, u carkvu chadžu.
— Jak vy staviciesia da taho, što zapaviedź «nie zabi» budzie parušacca?
— Drenna, vielmi drenna. Ja ž kažu, što śmiarotnaje pakarańnie — heta sprečnaje pytańnie. Jak baćka, ja za śmiarotnaje pakarańnie. Ale kali i kazać pra heta, to treba razhladać maratoryj, ale nie admienu. Na siońnia 80% biełarusaŭ padtrymlivajuć śmiarotnaje pakarańnie.
— Chto pravodziŭ apytańnie?
— My sumiesna ź mižnarodnymi arhanizacyjami.
— Jakimi arhanizacyjami, kali ź Biełaruśsiu i Rasijaj ciapier nichto ŭ śviecie mieć spravu nie choča?
— Usie buduć mieć. Usio heta kazki. Nichto ad nas nikudy nie dzieniecca.
— U mianie jašče takoje pytańnie. Hladžu, što adbyvajecca ŭ krainie, čytaju naviny pra toje, što zakryvajuć biełaruskamoŭnyja kniharni. Adčuvaju siabie ŭ niebiaśpiecy z-za hetaha. Što na hety kont skažacie?
— My bahatyja tym, što ŭ nas dźvie dziaržaŭnyja movy.
— Ale ž jany musiać być roŭnyja. Ci jość ciapier albo, moža, raspracoŭvajucca zakonaprajekty, jakija tyčycca biełaruskaj movy?
— Samaje hałoŭnaje — nie pajści pa darozie prymusu. Kali niejkaja kampanija robić rolik na biełaruskaj movie — cudoŭna. Voś nie treba iści, jak Ukraina. Tam zrabili adnu dziaržaŭnuju movu. Tak nielha. Jak deputat, ja padtrymaju luby prajekt na hety kont.
— Ja asabista sutykałasia z dyskryminacyjaj biełaruskaj movy.
— Takoha być nie pavinna. Ja adstojvaju vašy intaresy. Kali vam niechta tak skaža, abaviazkova paviedamlajcie mnie. Usio vyrašym. Ja sakrataru zaraz skažu, kab jana vas sa mnoj adrazu złučała, navat kali ja ŭ parłamiencie.
— A himn mianiać nie płanujuć? Tam takija słovy…
— Nie, navošta. U nas cudoŭny himn. «My — biełarusy, mirnyja ludzi…»
— Mirnyja, a ŭ vajnu nas uciahnuli.
— Ciapier vam praŭdu ŭsiu raskažu. Nikoli ni ŭ jakoj vajnie nie ŭdzielničali i nie budziem udzielničać, ale kali budzie na Biełaruś napad — źniščym usich. Jość vajna NATA z Rasijaj na terytoryi Ukrainy. U mianie babula z Adesy, vy viedajecie heta? U mianie svajaki va Ukrainie. Va ŭsim vinavatyja ŭkrainskija palityki, jakija źniščali Ukrainu z 2014 hoda (heta typovy naratyŭ rasijskaj prapahandy. — «NN»). Samaje strašnaje, što ŭkrainski narod nie vyrašaje svoj los. Biełaruś u śpiecyjalnaj vajennaj apieracyi nie ŭdzielničaje.
— Ale ž terytoryju svaju daje.
— Budziem davać, bo my ŭ vajennym sajuzie z Rasijaj.
— U Kanstytucyi zapisana pra niejtralitet.
— Heta byŭ idyjocki punkt, jaki byŭ niapravilna zapisany. Nijakaha niejtralitetu nie byvaje. Ci NATA, ci Rasija, ci Kitaj. Kali palaki nie adviaduć ad našaj miažy vojska, dyk sto hadoŭ tut buduć znachodzicca rasijskija vajskoŭcy razam ź biełaruskimi. Polšča ŭstupiła ŭ Jeŭrasajuz, a naša prava być u sajuzie z Rasijaj. Biez mocnaj Rasii siońnia nie budzie Hruzii, Ukrainy, Tadžykistana. Jany tam u Polščy pavinny pračnucca i siabravać ź biełarusami. Cichanoŭskuju z Łatuškam pryvieźci nam u bahažniku.
Čytajcie taksama:
Łukašenka padpisaŭ rasstrelnyja papraŭki za «zamach na teraryzm». Interpretacyja taho, što takoje «teraryzm», vielmi šyrokaja
Maskoŭskija deputaty prapanavali nazvać terytoryju kala ambasady ZŠA płoščaj Abaroncaŭ Danbasa. Amierykancy nie suprać
