Jak lepiej abaranić siabie ad sonca?
Jak by ni padmanvała nas nadvorje, ale da leta zastałosia mienš za try tydni. Nabližajecca toj samy čas, kali i ŭ horadzie, i tym bolš na adpačynku vielmi važna abaraniać svaju skuru ad niebiaśpiečnych soniečnych pramianioŭ. Voś asnoŭnyja rekamiendacyi pra toje, što vam u hetym dapamoža.
Fota: pixabay.com
Ultrafijalet pastajanna traplaje na Ziamlu ad Sonca. Pry hetym uzrovień ultrafijaletavych pramianioŭ hrupy V macniejšy letam, kali sonca śviecić najbolš jarka, ale ŭzrovień inšych ŭtrafijaletavych pramianioŭ, hrupy A, maje adnu i tuju ž intensiŭnaść na praciahu hoda, tłumačyć The Times.
Ultrafijalet upłyvaje na skuru roznym čynam. Jon nie tolki stvaraje ŭ tkankach cieła ciapło praz akiślalnyja chimičnyja reakcyi, ale i vyklikaje pramoje paškodžańnie białkoŭ i DNK, što pryvodzić da raspadu niekatorych rečyvaŭ (naprykład, kałahienu) i stymulacyi źmianieńniaŭ u funkcyi kletak.
Kab uratavacca ad ultrafijaletu, možna nasić adzieńnie, jakoje prykryvaje cieła, ale ž dla adkrytych častak cieła najlepšym vybaram stanie soncaachoŭnaja kaśmietyka. Karystańnie joj — pieršy i asnoŭny krok u abaronie ad sonca. Vybirajcie kremy ci łaśjony z faktaram SPF nie mienš za 15, a pa mierkavańniach niekatorych dermatołahaŭ, i ŭvohule nie mienš za 30.
Takuju kaśmietyku treba nanosić na skuru kožnyja 90 chvilin, kab sapraŭdy atrymać tuju stupień abarony ad sonca, jakaja paznačana na bancy. Taksama ekśpierty rajać nanava ŭžyvać krem ad sonca paśla płavańnia ci intensiŭnaj fizičnaj nahruzki, kali vy šmat paciejecie.
Šmat chto nie vykarystoŭvaje kaśmietyki ad sonca ŭ pachmurnyja dni, i časam mienavita ŭ takija dni my nazirajem samyja mocnyja soniečnyja apioki, bo nam zdajecca, što navokał niama sonca. Ale ž na samoj spravie i ŭ pachmurnaje nadvorje ŭsio jašče treba ŭžyvać soncaachoŭnuju kaśmietyku na adkrytych častkach cieła, bo šmat jakija vidy raku raźvivajucca praz nakaplalny ŭpłyŭ sonca. Bonus: užyvańnie takoj kaśmietyki zapavolić stareńnie skury.
Brytanski dermatołah Andžali Machta, ź jakim pahutaryli žurnalisty The Times, źviartaje ŭvahu na toje, što isnuje dva vidy soncaachoŭnaj kaśmietyki: minieralnyja i chimičnyja srodki. Minieralnaja kaśmietyka źmiaščaje ŭ siabie cynk i tytan i pačynaje pracavać, jak tolki traplaje na skuru, u toj čas jak chimičnyja srodki abarony ad sonca treba nanosić nie mienš za 20 chvilin da vychadu na vulicu. Daktary rajać pryvučyć siabie da štodzionnaha vykarystańnia soncaachoŭnaj kaśmietyki.
Jość śviedčańni, što antyaksidanty (naprykład, vitaminy S ci Je) pavialičvajuć ustojlivaść skury da ŭździejańnia ŭltrafijaletu. Tamu, kali vy vykarystoŭvajecie dla skury syrovatki na asnovie antyaksidantaŭ, heta taksama moža trochi źnižać škodu ad znachodžańnia na soncy. Siarod inšych rekamiendacyj adznačym našeńnie hałaŭnoha ŭboru padčas znachodžańnia na soncy, paźbiahańnie sonca ŭ čas z 10 da 14 hadzin i znachodžańnie ŭ cieni.
Kali sonca škodzić skury, na joj źjaŭlajucca prykmiety stareńnia: marščyny i źmieny pihmientacyi, dyfuznaje pačyrvanieńnie, skura robicca mienš pruhkaj i bolš hrubaj.
Kremy ad zaharu niebiaśpiečnyja pry kantakcie z vadoj z basiejnaŭ
«Strašyłki» pra manikiur. Ci moža zvykłaja pracedura vyklikać rak, VIČ i inšyja surjoznyja zachvorvańni?
