«Razam śpiavajem «Kupalinku». Zorka biełaruskaj opiery Illa Silčukoŭ pierajechaŭ u ZŠA i skaraje amierykanskuju publiku
Viadomy opierny śpiavak Illa Silčukoŭ debiutuje ŭ Paŭnočnaj Amierycy. Jon raspavioŭ «Našaj Nivie» pra svoj pierajezd i biełaruski prajekt, jaki źbiraje ŭ ZŠA poŭnyja zały.
Fota: Radyjo «Unet»
Paśla jaho zvalnieńnia z Opiernaha teatra (heta było ŭ kastryčniku 2020-ha) Illu Silčukova nielha było ŭbačyć na biełaruskaj scenie. Ale jon z pośpiecham vystupaŭ u inšych krainach Jeŭropy.
«U nas repiertuarny teatr, dzie pracuje stałaja trupa. U Jeŭropie ž bolš anhažymientnyja pastanoŭki, dzie ty musiš być zaŭsiody ŭ formie, prachodzić kastynhi adzin za druhim, inviestavać u ich za svoj košt. Premjery ładziacca takim čynam: dva-try tydni repietycyj, niekalki śpiektaklaŭ i paśla ŭsie raźjazdžajucca.
Kankurencyja vysokaja. Naprykład, kali my vystupali ŭ Francyi ŭ Manpielje, z Uschodniaj Jeŭropy ja byŭ adzinym śpievakom, — dzielicca Illa. — Astatnija — ź Italii, Kanady, Aŭstralii, Hiermanii, Šviecyi. Jeŭrapiejskaja opiera — heta zaŭsiody salanka z ŭsiaho śvietu.
Ale minskaja publika zastajecca majoj rodnaj. Heta jak paraŭnovać svoj dom z haściami».
U opiery ŭ francuzskim Manpielje. Fota: asabisty archiŭ
U lutym biełarus upieršyniu vystupić na amierykanskaj opiernaj placoŭcy. Heta sceničnaja viersija słavutaj kantaty Kłoda Debiuśsi na biblejski siužet «Błudny syn». Stavić jaje Tacoma Opera i Tacoma City Ballet. Śpiavak raskazvaje, jak udałosia atrymać zaprašeńnie:
«Ja vyjhraŭ adbor. Opiernyja teatry, kali adčyniajucca paśla kavidu ci na novy siezon, robiać abviestku ab nabory, i salisty sami ci praz ahienctva źviartajucca da teatraŭ. Tut prasłuchoŭvańni ładzilisia try dni — paśla kavidu vialiki popyt ŭ śpievakoŭ, usie zasumavali pa scenie. Było šmat pretendentaŭ».
U ZŠA Illa z vosieni. Tut daŭno žyvuć jaho baćki, ale śpiavak spyniŭsia ŭ inšym horadzie.
«Ja razhladaju heta jak stałuju kamandziroŭku. Spyniŭsia ja ŭ Bostanie, bo jon bližejšy da Jeŭropy, zručna padarožničać — ja časta lotaju ŭ Jeŭropu pa pracy. Z Łos-Andželesa ci Sietła — heta na šeść hadzin bolej lotu, i było b ciažka.
Ciapier staŭleńnie ŭ hramadstvie supiarečnaje — ci zastavacca ŭ Biełarusi i być pad štodzionnym nahladam i stresam, ci źjazdžać i pakutavać biez rodnaj ziamli, siabroŭ. Ja asabista zrabiŭ vybar, što treba jechać. Vieru, što heta nie nazaŭsiody, što stanoŭčyja źmieny ŭ našym hramadstvie adbuducca.
Mnie i ciapier chočacca, kab biełarusy, jak kaža kłasik, zajmieli hodny pasah miž narodami. Kab my šanavali svajo, skłalisia jak nacyja, sa svajoj ułasnaj kulturaj, nacyjanalna skiravanym śvietapohladam.
Ja liču siabie patryjotam svajoj radzimy. Tamu nie źjazdžaŭ, pakul była mahčymaść spakojna jeździć pracavać u Jeŭropie. A potym kožny raz prachodziš pašpartny kantrol, i nie ŭpeŭnieny, ciabie vypuściać ci nie.
Ciažka zastavacca ŭ Biełarusi, kali ty ŭ błek-liście i nie maješ nijakaj mahčymaści jak vorah narodu afišu mieć. Bolš za hod ja zastavaŭsia ŭ Minsku paśla zvalnieńnia i byŭ u niehałosnym stop-liście, u mianie nie było prajektaŭ».
U Amierycy śpiavak daje majstar-kłasy, a taksama ŭdzielničaje ŭ prajekcie, pryśviečanym našym kampazitaram i roznym epocham — «Čatyry stahodździ biełaruskaj vakalnaj muzyki».
«Heta prajekt, jaki my raspačali ź Biełaruskaj kapełaj jašče ŭ 2019 hodzie, ładzili imprezy ŭ Minsku. Paśla adnavili, bo maja siabroŭka i adnadumca, muzyka Taćciana Łojša tut znachodzicca, stała supracoŭničaje z opiernymi teatrami i muzyčnymi kampanijami.
My zrabili imprezu hetaha prajekta ŭ Vašynštonie — prychodziła dyjaspara, šmat amierkancaŭ, brazilcaŭ. Vialiki vodhuk mieła.
I my atrymali zaprašeńnie z Bostana, Fiładelfii, San-Francyska, Sietła. Poŭnyja zały źbirajem. Razam śpiavajem «Zorku Vienieru», «Kupalinku», «Mahutny Boža».
Heta, kaniečnie, padbadziorvaje. I ja ŭpeŭnieny, što heta budzie mieć plon, što praz usie našy ślozy zaźziaje sonca».
Zorka biełaruskaj Opiery Illa Silčukoŭ zapisaŭ «Mahutny Boža» VIDEA
«Sumleńnie daražejšaje» — Illa Silčukoŭ pra zvalnieńnie ź Vialikaha teatra za «amaralny ŭčynak»
