Cichanoŭskaja acaniła paraŭnańni svajho muža z Łukašenkam i prakamientavała vypady Sańnikava
Śviatłana Cichanoŭskaja dała vialikaje intervju jutub-kanału «Žyćcio-malina» Mikity Miełkaziorava. Tam jana raskazała pra toje, jak zapisvałasia videa ź joj u kabiniecie Jarmošynaj, čamu paśla vybaraŭ nie praviała inaŭhuracyju, ci budzie narešcie sustreča ź Zialenskim i jak adreahavała na vypady Sańnikava.
«U kabiniecie siadzieła Jarmošyna i dva čałavieki»
Śviatłana Cichanoŭskaja raspaviała pra toje, što było ŭ kabiniecie Jarmošynaj 10 žniŭnia 2020 hoda. Jana ŭspaminaje, što ludzi, jakija sustrakali jaje ŭ CVK, vielmi chvalavalisia i spačatku nie dazvalali joj prajści z advakatam.
«U kabiniecie siadzić spadarynia Jarmošyna i dva čałavieki [Andrej Paŭlučenka, kiraŭnik Apieratyŭna-analityčnaha centra, a ŭ minułym — achoŭnik Łukašenki, i Hienadź Kazakievič, namieśnik ministra ŭnutranych spraŭ. — NN]. Vychodzić Jarmošyna i kaža: «Vam jość pra što pahavaryć». Jany pytajucca ŭ Maksima Znaka: vy chto?
— Ja advakat.
— Pakažycie vaš dahavor.
— Jon u pryjomnaj.
— Nu pryniasicie.
Jon vychodzić, i jany jaho bolš nie puskajuć. Stała strašna, tamu što ty nie viedaješ, pra što z taboj buduć havaryć, ale ŭsia situacyja nie prosta tak».
Razmova praciahvałasia kala troch hadzin. Cichanoŭskaja kaža, što było ciažka pryniać rašeńnie, jana była ŭ paŭnieprytomnym stanie.
«Mnie dali listočak z tekstam, ja vykraśliła, što kazać nie budu. Tam byŭ nazvany nibyta pieramožca vybaraŭ.
Mnie prapanavali: abo ty źjazdžaješ da dziaciej, abo my nie harantujem, što ty zaraz dajedzieš da domu. Tłumačeńniaŭ nijakich nie było».
Byli čutki, što Cichanoŭskaj pakazvali videa z katavańniami muža. Jana heta admaŭlaje. Ale ŭspaminaje, što prasiła adpuścić Siarhieja ź joj. «Pakul heta niemahčyma», — adkazali joj.
Žurnalist Mikita Miełkazioraŭ paprasiŭ Śviatłanu Cichanoŭskuju prakamientavać vykazvańnie Łukašenki, što jon nibyta daŭ joj 15 tysiač dalaraŭ na adjezd.
«Kali źmienicca situacyja ŭ krainie, ja raspaviadu historyju całkam. Usie fakty raskažu potym», — paabiacała jana.
«Šmat chto ŭ žniŭni i vieraśni nastojvaŭ: «Davaj praviadziem inaŭhuracyju»
Žurnalist spytaŭ u Cichanoŭskaj, ci ličyć jana siabie prezidentam.
«Ja viedaju, što ludzi hałasavali za mianie na vybarach u 2020 hodzie. Ja viedaju, što ja hetyja vybary vyjhrała. Ale faktyčna nie kirujučy, nie majučy mahčymaści pracavać jak prezident u krainie, u mianie nie pavaročvajecca jazyk tak kazać. Ad taho, nazyvaju ja sabie tak ci nie nazyvaju, nie mianiajecca absalutna ničoha, — adkazała jana. —
Šmat chto ŭ žniŭni i vieraśni nastojvaŭ: «Davaj praviadziem inaŭhuracyju». A što b heta źmianiła?
Nu praviali b my inaŭhuracyju, spatrebiłasia b vialikaja praca pa pryznańni inšymi krainami ciabie mienavita prezidentam. Praces niepryznańnia lehitymnaści čałavieka, jaki hvałtam utrymlivaje ŭładu, — heta adno. Ale takoje dvojeŭładździe ŭ rozumach zamiežnych palitykaŭ troški kontraviersijnaje.
Mnohija nastojvali i pryčyny pryvodzili, čamu heta treba było zrabić, ale ja časta abapirajusia na svaju intuicyju. Ja da hetaha času nie viedaju, ci było heta pravilnaje rašeńnie».
Miełkazioraŭ zhadaŭ, što padčas pieradvybarčaj kampanii Siarhieja Cichanoŭskaha časta paraŭnoŭvali z Łukašenkam, kazali, što heta toj ža typaž.
«Ja takich paraŭnańniaŭ nie pamiataju. Ja prosta Siarhieja viedaju — heta zusim roznyja ludzi. Tak, jon naporysty, jon charyzmatyčny, pradprymalnik paśpiachovy. Roznyja zusim kanteksty ŭ majho muža i hetaha čałavieka. Dy ničoha supolnaha. Siarhiej vielmi čałaviečny, dobry», — adreahavała na heta Śviatłana Cichanoŭskaja.
«Nas byli b rady bačyć va Ukrainie, ale jany aściarožničajuć»
Čamu ŭ jaje dahetul nie było sustrečy z Uładzimiram Zialenskim?
«Nas byli b rady bačyć va Ukrainie. My atrymlivali zaprašeńnie ad čynoŭnikaŭ. Ale dumaju, tut sprava ŭ aściarožnaści. Situacyja va Ukrainie taksama pakidaje žadać lepšaha. Tam vielmi napružanaja abstanoŭka, i sustreča sa mnoj mahła b abvastryć jaje jašče bolš.
Jany vielmi aściarožničajuć. Ja viedaju, što jany nas padtrymlivajuć, ale mienavita sam fakt sustrečy byŭ by ciapier im nie na ruku», — patłumačyła palityk.
U intervju jana taksama raspaviała pra svaju achovu. Jaje supravadžajuć navat pry pachodzie ŭ kramu.
«Ja achoŭvanaja asoba ŭ Litvie. Ja jezdžu na dypłamatyčnyja vizity, i mianie prymajuć tak, jak kožnaha vysokapastaŭlenaha čynoŭnika. Achova dajecca ŭsiudy. Kolkaść achovy — heta ŭžo vyrašaje prymajučy bok. Vielmi vysoki ŭzrovień achovy byŭ u Polščy, Čechii».
«Čałaviek vykazaŭsia, ale było vidavočna, što dumajuć ludzi»
U Cichanoŭskaj spytali, jak jana adreahavała na vypady Sańnikava, jaki ŭ siabie ŭ fejsbuku publikavaŭ fota katlet, kab začapić jaje.
«Ja hetaha nie bačyła, nie čytała, mnie pra heta raskazali. Ale taksama mnie raspaviali pra toje, što było pad hetym artykułam, kolki było niehatyvu ŭ bok aŭtara i kolki słoŭ padtrymki mnie. Napeŭna, heta ŭraziła bolš. Čałaviek vykazaŭsia, u jaho jość takoje prava, ale było vidavočna, što dumajuć ludzi.
My bačylisia paśla taho. Była supolnaja sustreča demsiłaŭ u Polščy na niejkim forumie, my abmiarkoŭvali biahučyja pytańni, stratehii. Nichto na hetym uvahu nie akcentavaŭ. Heta nie adziny čałaviek, jaki vyrašyŭ vykarystać pradukt, kab mianie apisać, moža być, asudzić. Ja nie ŭ kryŭdzie navat na tych ludziej, jakija vykarystoŭvajuć bolš vostryja abrazy ŭ moj adras».
Čytajcie taksama:
«Naša Ministerstva kultury isnuje ŭ režymie navat nie XX, a XIX stahodździa». Pra što havaryli i na što damovilisia ŭdzielniki Biełaruskaj rady kultury
Cichanoŭskaja zaklikaje ŭdzielničać u refierendumie i pierakreślivać u biuleteni abodva varyjanty
«Stan vajennaj eskałacyi stanovicca normaj dla režymu». Cichanoŭskaja — pra mahčymy ŭdzieł Biełarusi ŭ vajennym kanflikcie
Stukačy, miantoŭskija prakładki, ssučanyja. Sańnikaŭ apublikavaŭ post, u jakim dastałasia ŭsim: «Našaj Nivie», Cichanoŭskaj, navat Šrajbmanu
