U Homieli byłoha milicyjanta asudzili na try miesiacy aryštu za źliŭ danych na 27 kaleh
U sudzie Savieckaha rajona Homiela 22 listapada da troch miesiacaŭ aryštu pavodle artykuła 203-1 KK (niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych) asudzili 30-hadovaha byłoha milicyjanta Uładzimira Kaško. Jaho abvinavacili ŭ źlivie administrataru ekstremisckaha telehram-kanała piersanalnych danych 27 supracoŭnikaŭ milicyi Homielščyny. Sudździa Andrej Łahunovič taksama pastanaviŭ spahnać z hamielčuka kampiensacyju maralnaj škody paciarpiełym u 13 600 rubloŭ, paviedamlajuć pravaabaroncy.
Artykuł u Kryminalnym kodeksie źjaviŭsia 26 maja 2021 hoda. Adrazu paśla ŭniasieńniaŭ dadatkaŭ u kodeks i raspačali kryminalnuju spravu suprać hamielčuka.
Pavodle viersii abvinavačvańnia, mužčyna «sa žniŭnia pa studzień 2020 hoda sabraŭ z roznych krynic źviestki pra pryvatnaje žyćcio 27 pravaachoŭnikaŭ Homielskaj vobłaści i pierasłaŭ ich niavyznačanamu kołu asobaŭ, što administrujuć destruktyŭny Telegram-kanał».
Paviedamlajecca, što abvinavačany adpraŭlaŭ zdymak supracoŭnika, paznačaŭ jaho proźvišča, imia, imia pa baćku, miesca pracy, numary telefonaŭ i spasyłki na staronki ŭ sacyjalnych sietkach. Časam paviedamlaŭ datu naradžeńnia, danyja pra asabisty transpart i blizkich svajakoŭ.
Paśla publikacyj milicyjanieram pastupiła mnostva telefanavańniaŭ i paviedamleńniaŭ, u tym liku z abrazami i pahrozami.
Uładzimir Kaško raniej pracavaŭ try miesiacy milicyjantam u Departamiencie achovy. Praź niekalki hadoŭ znoŭ viarnuŭsia na pasadu supracoŭnika patrulna-pastavoj słužby, ale praz čatyry hady jaho zvolnili. Z kanca 2019 hoda jon nie pracavaŭ.
Mužčyna pierapisvaŭsia z administratarami kanała, pierapisku vydalaŭ, adnak śledstvu ŭdałosia jaje adnavić.
U vyniku sudździa Andrej Łahunovič prysudziŭ jaho da troch miesiacaŭ aryštu. Taksama sud pastanaviŭ spahnać kampiensacyju maralnaj škody paciarpiełym u pamiery 13 600 rubloŭ.
