Ejsmant abvierhła infarmacyju, što Łukašenka abmiarkoŭvaŭ ź Mierkiel sankcyi
Alaksandr Łukašenka nie abmiarkoŭvaŭ z Anhiełaj Mierkiel sankcyi i «pryznańnie», heta było b nižej za jaho hodnaść, zajaviła «RIA Novosti» Natalla Ejsmant.
Raniej ministr zamiežnych spraŭ Estonii Eva-Maryja Lijmets zajaviła, što Łukašenka vysunuŭ umovaj spynieńnia mihracyjnaha kryzisu na miežach ES pryznańnie jaho prezidentam i skasavańnie sankcyj. Hetuju ŭmovu jon ahučyŭ Mierkiel padčas telefonnaj razmovy ŭ paniadziełak.
«Było b nižej za hodnaść prezidenta Łukašenki padymać u chodzie razmovy padobnyja pytańni ci vystaŭlać padobnyja ŭmovy. Ni adnaho słovy ab sankcyjach i tym bolš ab niejkim «pryznańni» ŭ chodzie razmoŭ skazana nie było. Tym bolš, što dla biełaruskaha hramadstva, jakoje abrała Łukašenku prezidentam krainy, takoha pytańnia nie isnuje», — skazała Ejsmant.
Pavodle jaje słoŭ, zajava kiraŭnika MZS Estonii «aznačaje, što pra toj praces, jaki ciapier idzie pa rašeńni prablemy biežancaŭ, u Estonii ŭ pryncypie ničoha nie viedajuć i ničoha ŭ im nie značać».
«Kiraŭniku MZS Estonii varta było b mieć na ŭvazie, što stenahramy hetych razmoŭ zachoŭvajucca jak u nas, tak i ŭ Niamieččynie. Chaj źviartajucca da partnioraŭ pa Jeŭrasajuzie, tam im, mahčyma, daduć praŭdzivuju infarmacyju», — padkreśliła Ejsmant.
