Biełaruskamoŭnaja himnazija №4, što ŭ Kuncaŭščynie, znachodzicca na rekanstrukcyi
Dla navučencaŭ staličnaj himnazii №4 novy navučalny hod pačaŭsia ŭ niekalki niazvykłym farmacie. Adnakłaśniki i piedahohi tyja ž, a voś ścieny — nie rodnyja. Letam u budynku hetaj ustanovy adukacyi pasialilisia budaŭniki, a dziaciej raźmierkavali pa susiednich škołach.
Pa słovach dyrektara himnazii Andreja Hocmana, abjekt pieražyvaje rekanstrukcyju — a niazručnaści, źviazanyja z ramontnymi pracami, — časovyja, pišuć Minsk-naviny.
— Našamu budynku 30 hadoŭ. Paśla jaho abśledavańnia vyśvietliłasia, što fasad i dach majuć patrebu ŭ madernizacyi. Kali nastupali chałady, u tarcovych kabinietach było niekamfortna, tamu vyrašana było całkam abnavić i sistemu aciapleńnia, — udakładniŭ jon.
Prystupić da kapitalnaha ramontu vyrašyli adrazu paśla zakančeńnia navučalnaha hoda: staršakłaśniki zdali dziaržaŭnyja ekzamieny, i 14 červienia na placoŭku pryjšli budaŭniki. Usio leta tut aktyŭna vialisia pracy.
Fasad uciaplili, abnavili abličča. Dla dyzajnierskaha afarmleńnia vykarystoŭvali piaščotna-sałatavyja adcieńni.
Himnazija № 4 — adna z samych vialikich ustanoŭ adukacyi stalicy, dzie ŭvieś navučalny praces prachodzić na biełaruskaj movie. Siońnia jaje naviedvajuć kala 1 000 dziaciej.
Unutry budynka maštabnych rabot nie płanujecca. Pa słovach dyrektara, kłasy kamfortnyja i dobra abstalavanyja. Na pieryjad ramontu himnazisty byli raźmierkavany pa troch škołach. Usie jany znachodziacca niepadalok ad himnazii. Naprykład, dla adzinaccacikłaśnikaŭ časovym miescam vučoby stała SŠ № 179.
— Akramia taho, z ulikam rekanstrukcyi budynka my sfarmavali tolki dva pieršyja kłasy. Adnak u nastupnym navučalnym hodzie adkryjem čatyry, — udakładniŭ dyrektar.
Što tyčycca terminaŭ budaŭnictva, to zaviaršyć raboty na abjekcie płanujecca da pačatku listapada.
