Chrenin pachvaliŭ «mudruju i abačlivuju» ataku Irana na Izrail
Ministr abarony Biełarusi Viktar Chrenin vysoka acaniŭ «mudruju i abačlivuju» rakietnuju ataku Irana na Izrail 13-14 krasavika. Ab hetym Chrenin zajaviŭ 27 krasavika na sustrečy sa svaim iranskim kaleham Machamadam Reza Aštyjani na palach kanfierencyi ministraŭ abarony ŠAS u Astanie, piša Reform.news sa spasyłkaju na Tasnim News Agency.
Sustreča biełaruskich i iranskich vajskoŭcaŭ. Fota: Tasnim
Chrenin asudziŭ avijaŭdar izrailskaha režymu pa dypłamatyčnaj misii Irana ŭ Damasku 1 krasavika jak parušeńnie mižnarodnaha prava, vysoka acaniŭšy «mudruju i abačlivuju» apieracyju Irana ŭ adkaz na izrailski napad, havorycca ŭ paviedamleńni.
Ministr abarony Biełarusi vykazaŭ hatoŭnaść umacoŭvać adnosiny ź Iranam u roznych halinach, niahledziačy na zachodnija sankcyi.
U svaju čarhu, ministr abarony Irana bryhadny hienierał Machamad Reza Aštyjani zajaviŭ, što Tehieran i Minsk padzialajuć pohlady pa asnoŭnych rehijanalnych i mižnarodnych prablemach i zaŭsiody padtrymlivali pazicyi i miery adzin adnaho.
«Asudziŭšy hienacyd i vajennyja złačynstvy izrailskaha režymu suprać siektara Haza, a taksama jaho fatalny napad na konsulski adździeł iranskaha pasolstva ŭ Siryi, Aštyjani zajaviŭ, što niezaležnyja dziaržavy, jak čakajecca, asudziać dziorzkaje parušeńnie izrailskim režymam mižnarodnaha prava», — havorycca ŭ paviedamleńni.
Iranski ministr padkreśliŭ vysoki patencyjał dźviuch krain u vajennym i abaronnym siektarach, vykazaŭšy hatoŭnaść Tehierana da bolš ciesnaha supracoŭnictva ź Minskam.
Vajenna-pavietranyja siły Izraila 1 krasavika nanieśli rakietny ŭdar pa budynku konsulstva Irana ŭ Damasku. Zahinuli nie mienš za siem čałaviek, u tym liku kamandzir padraździaleńnia «Al-Kuds» Korpusa vartavych Isłamskaj revalucyi (KSIR) hienierał Machamad Reza Zachiedzi i hienierał Machamad Chadzi Chadžy Rachimi. Vajennaja raźviedka Izraila zajaviła, što budynak nie zjaŭlaŭsia hramadzianskim, a vykarystoŭvaŭsia jak vajskovy budynak sił «Al-Kuds», jakija ŭdzielničali ŭ arhanizacyi napadaŭ na Izrail.
U adkaz Iran z 13 na 14 krasavika nanios masiravany ŭdar pa Izraili, vykarystaŭšy sotni dronaŭ, kryłatych i balistyčnych rakiet. Siły abarony Izraila paviedamili ab pierachopie padčas načnoha napadu 99% vypuščanych pa krainie rakiet i dronaŭ.
Čytajcie taksama:
