Navukoŭcy sabrali 15 miljonaŭ dalaraŭ na adradžeńnie mamanta
Dla hetaha im daviadziecca skryžavać mamanta sa słanom.
Fota commons.wikimedia.org.
Amierykanskija navukoŭcy pastavili ambicyjnuju metu — adradzić šarścistaha mamanta. Hety vid, što niekali žyŭ u Sibiry i Paŭnočnaj Amierycy, całkam vymier kala 10 tysiač hadoŭ tamu.
Užo bolš za dziesiać hadoŭ vučonyja abmiarkoŭvajuć pierśpiektyvu viarnuć mamantaŭ da žyćcia i navat zasialić ich u dzikuju pryrodu, časam navat razhladajučy jaje absalutna surjozna. Ale 13 vieraśnia stała viadoma, što hetaja inicyjatyva atrymała finansavańnie, jakoje moža nablizić čas jaje realizacyi, piša Guardian.
Razmova idzie pra 15 miljonaŭ dalaraŭ, jakija sabrała kampanija Colossal, što pracuje ŭ śfiery bijałohii i hienietyki. Suzasnavalniki arhanizacyi — pradprymalnik Bien Łam i prafiesar hienietyki ŭ Harvardzie Džordž Čorč.
Stroha kažučy, novaja žyvioła budzie nie zusim mamantam, a chutčej hibrydam šarścistaha mamanta i słana. Kab stvaryć takuju istotu, Łam i Čorč žadajuć zrabić u łabaratornych umovach embryjon, jaki budzie źmiaščać DNK mamanta. Dla hetaha bijainženieram patrebnyja kletki skury azijackich słanoŭ, jakija potym treba pieraprahramavać u stvałavyja kletki, što buduć źmiaščać DNK mamanta.
Z samim DNK prablem nie budzie. Hieny, adkaznyja za šerść mamanta i inšyja admietnyja rysy hetaj žyvioły, buduć vydzielenyja praz paraŭnańnie hienomu azijackich słanoŭ z hienomam, vydzielenym z znojdzienych pareštkaŭ mamantaŭ.
Paźniej embryjony byli pieraniesienyja ŭ surahatnuju žyviołu ci, mahčyma, u štučnuju matku. Kali ŭsio pojdzie pa płanu, što zusim nie harantavana, to, jak raźličvajuć vučonyja, pieršyja mamanty mohuć źjavicca na śviet na praciahu bližejšych šaści hadoŭ.
Adna z metaŭ prajekta — abaranić azijackich słanoŭ, jakija zaraz znachodziacca pad pahrozaj vymirańnia. Rysy, charakternyja dla mamantaŭ, daduć im mahčymaść vyžyvać u chałodnym klimacie. Ale kali zasialić tundru hibrydam słana i mamanta, heta moža taksama dapamahčy adradzić ekałohiju Arktyki.
