U Biełarusi pačynajuć vydavać bijamietryčnyja pašparty i ID-kartki. Jak ich atrymać i jak heta źmienić naša žyćcio
Z 1-ha vieraśnia ŭ Biełarusi pačnuć prymać dakumienty na afarmleńnie ID-kartak i bijamietryčnych pašpartoŭ. Jak i raniej, zajavy prymajuć adździeły pa hramadzianstvie i mihracyi. Vydavać novyja dakumienty buduć pa žadańni, to-bok zvykły papiarovy pašpart taksama budzie dziejničać.
Viadoma, što ŭ adździełach pa hramadzianstvie i mihracyi ŭstanavili kala 300 aparataŭ, pry dapamozie jakich možna atrymać bijamietryčnyja źviestki hramadzianaŭ. Jość i mabilnyja aparaty: kali čałaviek pa stanie zdaroŭja nie moža pryjści ŭ AHIM, śpiecyjalisty pryjeduć da jaho dadomu.
Jakija bijamietryčnyja danyja buduć źbirać? Adbitki palcaŭ, fota i asabisty podpis hramadzianina. Patrabavańni da fota tyja ž, što i dla afarmleńnia zvyčajnaha pašparta — pažadana vyhladać maksimalna naturalna, vušy i brovy pavinny być adkrytyja.
Bijamietryčny pašpart i ID-kartka — dva roznyja dakumienty.
ID-kartka — heta płastykavaja kartka, na jakoj z adnaho boku budzie fota ŭładalnika, proźvišča, imia i imia pa baćku, asabisty numar, data naradžeńnia, termin dziejańnia kartki i jaje numar, asabisty podpis i značok bijamietryi. Na advarotnym baku budzie QR-kod i čyp, na jakim zachoŭvajecca ŭsia piersanalnaja infarmacyja pra ŭładalnika, jaho bijamietryčnyja źviestki, dostup da infarmacyi možna atrymać pa PIN-kodzie, taksama da kartki pryviazany elektronny podpis čałavieka. Sčytać infarmacyju z kartki dystancyjna i biez dazvołu ŭładalnika nielha, sistema zapatrabuje PIN-kod.
Bijamietryčny pašpart — heta nievialikaja knižka, takaja ž, jak i ciapierašnija pašparty, dzie na pieršaj staroncy buduć piersanalnyja danyja, astatnija staronki — dla viz i štampaŭ ab pierasiačeńni miažy.
Za ID-kartku treba zapłacić 1,5 bazavaj vieličyni (na siońnia heta 43,5 rubla), za bijamietryčny pašpart — 2 bazavyja vieličyni (58 rubloŭ). Dla invalidaŭ I i II hrupy, piensijanieraŭ i niepaŭnahadovych jość ilhoty — 1 i 1,5 bazavaj vieličyni adpaviedna. Termin vyrabu novych dakumientaŭ — 15 dzion, za dapłatu možna paskoryć praces — za siem ci navat za piać dzion. Vydajucca dakumienty pa miescy rehistracyi, ID-kartka budzie dziejničać dziesiać hadoŭ dla darosłych i piać hadoŭ dla dziaciej.
Važna: dakumienty novaha typu vydajuć pa žadańni. Heta značyć, pašpart staroha ŭzoru praciahvaje dziejničać uvieś termin, ukazany ŭ dakumiencie. Pry zamienie možna prasić vyrabić taki ž. Ale kali vy aformicie ID-kartku, viarnucca da zvyčajnaha papiarovaha pašparta budzie ŭžo niemahčyma.
Adnak dziaržaŭnyja pasłuhi płanujuć pastupova pryviazać da dakumientaŭ novaha typu, kab takim čynam zaachvocić hramadzianaŭ usio ž taki afarmić i ID-kartku, i bijamietryčny pašpart.
Naprykład, na pamiežnych pierachodach u aeraportach ustanoviać abstalavańnie dla sčytvańnia infarmacyi z pašparta — uładalnik bijamietryčnaha dakumienta moža nie stajać u čarzie da pamiežnikaŭ, praces budzie aŭtamatyzavany.
Uładalniki ID-kartki atrymajuć elektronny ličbavy podpis, heta dazvolić atrymlivać pasłuhi ad dziaržaŭnych instytucyjaŭ, naprykład padać dekłaracyju ŭ padatkovuju (zaraz elektronny kluč vydajuć na fłešcy).
