Franak Viačorka pra pieramovy Pucina i Bajdena: Biełaruś — kryštalna čystaja tema, tut niama roznačytańniaŭ
Daradca Śviatłany Cichanoŭskaj, kiraŭnik adździeła mižnarodnaj palityki Franak Viačorka prakamientavaŭ «Našaj Nivie» sustreču Džo Bajdena i Uładzimira Pucina, a taksama ichnuju razmovu adnosna Biełarusi.
Franak Viačorka
«Dobra, što Biełaruś staić na paradku dnia. Sam fakt abmierkavańnia na takim uzroŭni stavić Biełaruś u adnu z topavych temaŭ u suśvietnym paradku dnia, a nie jeŭrapiejskim ci rehijanalnym.
Biełaruski kryzis vyjšaŭ za miežy ŭnutrypalityčnaha — heta stała prablemaj, i heta abmiarkoŭvajuć kiraŭniki supierdziaržavaŭ. Pakolki farmat i kancept sustrečy nie dazvalali prymać niejkija rašeńni i vypracavać darožnyja karty, tut my bačym abaznačeńnie pazicyj. Za hetaj sustrečaj buduć nastupnyja.
Dla biełarusaŭ vielmi važna, što Bajden ahučyŭ pazicyju mienavita demakratyčnych siłaŭ. My praciahvajem kamunikavać sa Štatami, rychtujem tudy vizit Śviatłany Cichanoŭskaj. Dumaju, što ŭžo ciaham bližejšych tydniaŭ my ŭbačym dziejańni Vašynhtona adnosna Łukašenki. Raniejšyja sankcyi — heta tolki pačatak. Dumaju, što mienavita heta Bajden moh abaznačyć Pucinu.
Što tyčycca zajavy pra paŭhoda, to ja nie dumaju, što heta tyčycca Biełaruś. U adroźnieńnie ad usich inšych temaŭ, što jany abmiarkoŭvali, Biełaruś — heta kryštalna čystaja tema, tut jasna ŭsio, tut niama roznačytańniaŭ. Vyniki taho, što ZŠA pačali abaznačać temu Biełarusi, my pabačym značna raniej za paŭhoda, i heta nijak nie źviazana z Pucinym. Heta buduć vielmi kankretnyja zachady ŭ bok Łukašenki. U bližejšyja tydni my taksama pabačym bolš sinchronnuju pazicyju pa Biełarusi Brusela, Vašynhtona i Łondana.
Zbližeńnie pazicyj Bajdena i Pucina moža być tolki vakoł niejkich dziejańniaŭ. Na hety momant i ZŠA, i Rasija ŭ śpisie mahčymych miedyjataraŭ. My nie chočam, kab amierykancy z rasijanami vyrašyli naš los, my pavinny rabić heta sami. Ale nam važna, kab Maskva i Vašynhton pryniali naš płan, kali my prapanavali arhanizacyju vybaraŭ ź mižnarodnym udziełam, jakim papiaredničali b pieramovy pad mižnarodnaj miedyjacyjaj. Ja dumaju, što zbližeńnie moža być tolki ŭ hetym pytańni.
Čamu takaja miedyjacyja patrebnaja? Kab trymać Łukašenku pad kantrolem, kab režym nie handlavaŭ palitviaźniami, kab vykonvalisia damoŭlenaści. Tema palitviaźniaŭ źjaŭlajecca nieadździelnaj ad temy novych vybaraŭ. Navat kali Łukašenka pačnie vypuskać žurnalistaŭ ci tych, chto padpisaŭ prašeńnie ab pamiłavańni, heta nie pryviadzie jaho da narmalnaści.
Apošniaja viersija łukašenkaŭcaŭ adnosna pasadki samalota Ryanair — heta, što ŭsio spłanavali amierykancy. Dumaju, takuju infarmacyju atrymlivajuć u Kramli ad biełaruskaha KDB. My žyviom u śviecie postpraŭdy, kožny stvaraje sabie svaju praŭdu. Kreml ad pačatku apraŭdvaŭ Łukašenku ŭ hetaj situacyi, sastupić jany nie mohuć užo. Ale ja nie dumaju, što choć niechta vieryć u viersii biełaruskaj prapahandy».
Čytajcie taksama:
«He didn't disagree». Bajden raskazaŭ, što abmierkavaŭ z Pucinym Biełaruś
«Heta toje samaje miesca, dzie naŭrad ci treba sprabavać zblizić pazicyi — heta niemahčyma». Piaskoŭ zajaviŭ pra razychodžańnie pazicyj pa Biełarusi ŭ Pucina i Bajdena
