Bałharyja zapadozryła rasijan u arhanizacyi vybuchaŭ na vajskovych abjektach
Prakuratura Bałharyi rasśleduje mahčymaje dačynieńnie hramadzian Rasii da arhanizacyi sieryi vybuchaŭ u krainie. Metaj napadaŭ mahli być bojeprypasy, pryznačanyja dla pastaŭki ŭ Hruziju i Ukrainu. Mahčymyja dyviersii prachodzili jak minimum z 2011 da jak minimum 2020 hoda. Pra heta viedamstva paviedamiła na pres-kanfierencyi ŭ sieradu, paviedamlaje Radyjo Svaboda.
«Z vysokaj stupieńniu ŭpeŭnienaści možna zrabić vysnovu, što dziejańni rasijskich hramadzian byli nakiravanyja na spynieńnie pastavak śpiecpradukcyi ŭ Hruziju i Ukrainu», — cytuje Bałharskaja słužba Radyjo Svaboda pradstaŭnika Hienprakuratury Sijku Milevu.
Jemialjan Hiebreŭ
Raniej paviedamlałasia, što rasijanie — supracoŭniki HRU mohuć być datyčnyja da zamachu na miascovaha biznesmiena Jemialjana Hiebreva, jaki zajmaŭsia pastaŭkami zbroi. Śledstva vyvučaje mahčymaje dačynieńnie Rasii da vybuchu 12 listapada 2011 hoda na składzie kampanii Hiebreva EMCO, dzie znachodziłasia pradukcyja, pryznačanaja dla Hruzii.
Dva paśladoŭnyja vybuchi adbylisia na składach vajskovaha zavoda ŭ Ihanavie ŭ centry krainy ŭ sakaviku i krasaviku 2015 hoda. Tam, pavodle danych Ministerstva ekanomiki Bałharyi, hetak ža zachoŭvałasia pradukcyja EMCO.
31 maja 2015 hoda adbyŭsia pažar u budynku byłoha Instytuta śpiecyjalnaj techniki ŭ Safii, u vyniku jakoha zhareli materyjały rasśledavańnia vybuchaŭ u Ihanavie. U 2020 hodzie vybuch adbyŭsia na składzie zavoda «Arsienał» kala horada Myhliža.
Zajava bałharskaj prakuratury pastupiła praz 11 dzion paśla taho, jak premjer-ministr Čechii Andrej Babiš aficyjna abvinavaciŭ rasijskuju vajskovuju vyviedku ŭ vybuchu vajskovych składoŭ u Vrbiecicy ŭ kastryčniku 2014 hoda.
