Źjaviłasia kniha pra lehiendarny biełaruski hurt Neuro Dubel: 32 hieroi raskazvajuć «amal praŭdzivuju» historyju kalektyvu
Kniha pra adzin z samych značnych biełaruskich rok-hurtoŭ Neuro Dubel vyjšła ŭ vydaviectvie «Januškievič». Aŭtary Pavieł Vałatovič i Alaksiej Kavaloŭ padkreślivajuć, što jana pryśviečana nie frantmienu Alaksandru Kulinkoviču, a hurtu ŭ cełym. U asnovu lahli intervju z tryccaćciu dvuma hierojami — muzykantami, ich blizkimi i žurnalistami. Kniha «Vializny cień daždžavoha čarviaka: Amal praŭdzivaja historyja hurta Neuro Dubel» viartaje ŭ časy, kali muzyki byli na piku svajoj papularnaści.
Nazva adsyłaje da viadomaj pieśni «Paŭcarstva», a druhoj častkaj — da alboma «Praŭdzivaja historyja ab tym, jak u Karłsana ŭkrali kambiniezon». Kniha ž pradstaŭlajecca jak «amal praŭdzivaja», tamu što pra adny i tyja ž padziei roznyja surazmoŭcy tut raskazvajuć pa-roznamu.
Pavieł Vałatovič, što niekali zajmaŭsia fan-sajtam hurta i peŭny čas administravaŭ aficyjny sajt Neuro Dubel, pačaŭ pisać knihu jašče ŭ siaredzinie 2000-ch, ale tady z peŭnych pryčyn jana nie paŭstała. Viarnucca da materyjału daviałosia paśla śmierci vakalista Juryja Navumava ŭ minułym hodzie.
«Pavodle maich asabistych uražańniaŭ, niedzie z 1998 da 2003 hod, kali vynieści za dužki N.R.M. i «Lapisa Trubiackoha», heta byŭ samy papularny biełaruski hurt, — kaža Pavieł Vałatovič. — Mienavita hety čas ja zaśpieŭ, kali pačaŭ słuchać Neuro Dubel sam. Ja byŭ śviedkam taho, jak litaralna za niekalki hadoŭ ad padvałaŭ i nieprafiesijnych kvaternych zapisaŭ jany pryjšli da piku papularnaści. Amal što praz dvaccać hadoŭ my zmahli mientalna viarnucca ŭ tyja časy».
Z dapamohaj tryccaci dvuch intervju kniha raskazvaje pra ŭsich udzielnikaŭ hurta, va ŭspaminach havorka idzie i pra muzyku, i pra asabistaje žyćcio, i pra ałkahol-narkotyki. «Nam było važna raskazać pra kožnaha i pa mahčymaści z kožnym parazmaŭlać, — kaža Alaksiej Kavaloŭ. — My nikoli nie mieli niepasrednaha dačynieńnia da hurta i heta dobra, bo dazvoliła nam być maksimalna niezaležnymi ad svaich ułasnych acenak. Ad siabie my skazali tolki paru słoŭ u pačatku».
Pavieł zhadvaje, jak adzin ź pieršych čytačoŭ, siabar Alaksandra Kulinkoviča, padzialiŭsia, što «Vializny cień» stvaraje ŭražańnie, byccam ty siadziš ź jaho hierojami la vohnišča i słuchaješ historyi, jakija jany tabie raskazvajuć.
Pavodle vydaviectva «Januškievič», «takoj unikalnaj knihi ŭ vydaviectvie jašče nie vychodziła». Vokładku zrabiła Natalla Pavalajeva — aŭtarka vokładak pieršych albomaŭ Neuro Dubel. Vydańnie vyjšła nakładam u piaćsot ekzemplaraŭ i ciapier dastupnaje ŭ prodažy.
