Kiraŭnik IBA: «Da našych kampanij jość pytańni ŭ častcy karektnaści vypłaty padatkaŭ»
U pravaachoŭnych orhanaŭ Biełarusi majucca pytańni da kampanij IBA Group u častcy karektnaści vypłaty padatkaŭ. Pra heta havorycca ŭ kamientary saŭładalnika i staršyni praŭleńnia IBA Group Siarhieja Laŭciejeva dla supracoŭnikaŭ kampanii.
Siarhiej Laŭciejeŭ (sprava) ź ministram pa padatkach i zborach Siarhiejem Nalivajkam, iba.by.
«Da našych kampanij, sapraŭdy, jość pytańni ŭ častcy karektnaści vypłaty padatkaŭ, ale kampanii i kiraŭnictva pracujuć u štatnym režymie. My całkam adkrytyja dla supracoŭnictva z kantralujučymi orhanami i spadziajemsia, što sutnaść pretenzij u bližejšy čas budzie rastłumačanaja i ŭrehulavanaja», — havorycca ŭ kamientary Laŭciejeva.
«Suviaź ź inšymi padziejami, jakija adbyvajucca ŭ Biełarusi i ahučanyja ŭ ŚMI, vidavočna nadumanaja i nie maje pad saboj nijakich padstaŭ», — dadaŭ jon.
Siarhiej Laŭciejeŭ upeŭnieny, što «hetyja akaličnaści nie akažuć niehatyŭnaha ŭpłyvu na chod vykanańnia prajektaŭ i ŭzajemaadnosiny z partniorami i zakazčykami».
Kiraŭnik IBA paćvierdziŭ, što ciapier pravodzić adpačynak u Biełarusi i «naviedvaje zaniatki ŭ FAKu [kampanii] u adpaviednaści z raskładam».
Učora źjaviłasia infarmacyja pra toje, što siłaviki zacikavilisia dziejnaściu kiraŭnictva IBA Group. Paviedamlałasia ab zatrymańni člena praŭleńnia, pieršaha namieśnika staršyni praŭleńnia IBA Group, dyrektara pa raspracoŭcy PZ, hiendyrektara IBA IT Park Siarhieja Akuliča. Infarmacyja pra miescaznachodžańnie samoha Laŭcieva była supiarečlivaj.
Čytajcie taksama: «IBA — zanadta «saŭkovaja» kantora» — acenki internet-kamientataraŭ palarna padzialilisia
