Aryštavanaje kiraŭnictva IBA Group, jakaja ŭvachodzić u top-3 IT-kampanij Biełarusi
Pravaachoŭnyja orhany Biełarusi zacikavilisia dziejnaściu kiraŭnictva bujnoj i adnoj z najstarejšych IT-kampanij Biełarusi — IBA Group. Jak paviedamili TUT.BY niekalki krynic, u pole zroku siłavikoŭ trapili staršynia praŭleńnia IBA Group, hiendyrektar IBA Minsk Siarhiej Laŭciejeŭ i siabra praŭleńnia, pieršy namieśnik staršyni praŭleńnia IBA Group, dyrektar pa raspracoŭcy PZ, hiendyrektar IBA IT Park Siarhiej Akulič.
Fota Andreja Davydčyka, dev.by.
«Akulič zatrymany ŭžo tydzień jak», — śćviardžaje surazmoŭca. Pavodle jaho słoŭ, spravaj zajmajecca Śledčy kamitet, pryčyna — uchileńnie ad vypłaty padatkaŭ.
Nakont Laŭciejeva pakul prychodzić supiarečlivaja infarmacyja, jakaja nie dazvalaje śćviardžać, što jon znachodzicca pad vartaj.
«Siarhiej Ivanavič [Akulič] znachodzicca na balničnym. Siarhiej Vadzimavič [Laŭciejeŭ] ciapier u adpačynku. Ale pieryjadyčna zachodzić u ofis. Niadaŭna hulaŭ u tenis», — skazali ŭ pres-słužbie IBA Group. Akulič niedastupny pa mabilnym telefonie. Laŭciejeŭ nie adkazaŭ na zvanok.
Krynicy, blizkija da kampanii, zapeŭnivajuć, što Laŭciejeŭ i Akulič «pajšli ŭ adpačynak» amal adnačasova — 11 i 12 žniŭnia. Zamiest ich pryznačyli tych, chto vykonvaje abaviazki kiraŭnikoŭ.
Inšyja surazmoŭcy nie vyklučajuć, što ŭ siłavikoŭ cikavaść da IT-biznesmienaŭ uźnikła paśla zatrymańnia vykanaŭčaha dyrektara Biełarusbanka Anatola Bahavika i hiendyrektara Bankaŭskaha pracesinhavaha centra Hienadzia Zubarava praz «abnajaŭki i adkaty».
IBA źjaŭlajecca viadučym raspracoŭščykam, vytvorcam i pastaŭščykom infarmacyjnych technałohij. Siarod klijentaŭ kampanii šmat dziaržstruktur, bujnych dziaržpradpryjemstvaŭ i bankaŭ. U pryvatnaści, IBA na praciahu mnohich hadoŭ akazvaje pasłuhi pa sistemna-techničnaj padtrymcy i ramoncie abstalavańnia prahramna-techničnaha kompleksu centralizavanaj aŭtamatyzavanaj bankaŭskaj sistemy AAT «ASB Biełarusbank». Kiraŭnictva kampanii atrymała bolš za piać listoŭ z padziakaj za supracoŭnictva za podpisam Anatola Bahavika, śviedčać dadzienyja kampanii.
Atrymać kamientar u pres-słužbie KDB i SK nie ŭdałosia.
IBA Group — adzin z najbujniejšych sistemnych intehrataraŭ, raspracoŭščykaŭ, vytvorcaŭ i pastaŭščykoŭ infarmacyjnych technałohij u Centralnaj i Uschodniaj Jeŭropie. Biełaruski ofis chołdynhu źjaŭlajecca klučavym dla hrupy i ŭvachodzić u top-3 kampanij Parku vysokich technałohij pa abjomie realizacyi, ekspartu, pastaŭščykoŭ IT-rašeńniaŭ na biełaruski rynak i pa kolkaści kampanij-rezidentaŭ. U červieni IBA adkryła navukova-vytvorčy kłastar na terytoryi PVT koštam kala 40 młn dalaraŭ.
«Naša Niva» atrymała ad svaich krynic paćviardžeńnie, što infarmacyja pra aryšt adpaviadaje rečaisnaści.