Mižnarodnaja finansavaja karparacyja moža pakryć daŭhi «Jeŭraopta» i stać jaho suŭłaśnicaj
Mižnarodnaja finansavaja karparacyja (IFC), jakaja źjaŭlajecca častkaj Suśvietnaha banka, moža ŭkłaści da 55 młn dalaraŭ u statutny fond kampanii «Jeŭrahandal», jakaja kiruje sietkaj mahazinaŭ «Jeŭraopt». Pra heta havorycca ŭ paviedamleńni IFC u raździele raskryćcia infarmacyi ab uhodach karparacyi.
Fota: Ihar Remzik, TUT.BY
Na zaćviardžeńnie savieta dyrektaraŭ IFC vyniesieny prajekt ahulnym koštam 291 młn dalaraŭ, jaki płanujecca realizavać u 2016-2019 hh. Ź ich 91 młn dalaraŭ pryznačany dla inviestycyj u pašyreńnie sietki i klijenckaj bazy, a 200 młn — na refinansavańnie abaviazacielstvaŭ «Jeŭrahandlu». «Prapanavanaje finansavańnie z boku IFC — heta inviestavańnie ŭ statutny kapitał [»Jeŭrahandlu»] da 55 młn dalaraŭ. Inviestycyi buduć rabicca pa ŭsioj Biełarusi», — adznačajecca ŭ paviedamleńni mižnarodnaj karparacyi.
Takim čynam, IFC moža stać suŭłaśnikam «Jeŭrahandlu». Ciapier rytejleram na parytetnych pačatkach vałodajuć Siarhiej Litvin i Uładzimir Vasilka. Pavodle dadzienych na luty 2015 hoda, statutny fond «Jeŭrahandlu» składaŭ 120 młn dalaraŭ.
Pa stanie na 1 studzienia 2016 hoda sietka «Jeŭraopt» naličvała 438 kram ahulnaj płoščaj 256,5 tys. kv. m. Akramia taho, «Jeŭrahandal» vałodaje 6 łahistyčnymi centrami ahulnaj płoščaj 108 tys. kv. m. 47% ad ahulnaj płoščy kram znachodzicca ŭ arendzie, a 53% — naležać «Jeŭrahandlu» (pieravažna heta kramy vialikich farmataŭ). U dalejšym kampanija maje namier pašyrać sietku, u asnoŭnym za košt handlovych abjektaŭ małych i siarednich farmataŭ, a taksama pieravažna arandavać pamiaškańni, skazana ŭ materyjałach IFC.
«Realizacyja prajekta daść mahčymaść stvaryć pryblizna 3 tys. novych pracoŭnych miescaŭ, 80% ź jakich zojmuć žančyny. Akramia taho, prajekt budzie vykonvać funkcyju pieradačy najlepšych praktyk i mieć demanstracyjny efiekt, u pryvatnaści, dla inšych kampanij, kab inviestavać u krainu i rehijon», havorycca ŭ paviedamleńni dla inviestaraŭ.
Razhlad dadzienaha prajekta savietam dyrektaraŭ IFC pavinien adbycca 30 vieraśnia 2016 hoda.
IFC źjaŭlajecca adnym z najbujniejšych inviestaraŭ u Biełarusi. U rytejle karparacyja aktyŭna supracoŭničaje ź sietkaj univiersamaŭ «Rubloŭski». Što tyčycca inviestycyj u statutny kapitał, to na dadzieny momant IFC źjaŭlajecca akcyjanieram BNB-Banka i maje dolu ŭ kampanii «Staraja krepaść».
Jak raspaviali inviestbankiry, «Jeŭrahandal» užo daŭno razhladaŭ mahčymaść pryciahnuć inviestara ŭ prajekt. U pryvatnaści, kampanija pačynała dumać pra praviadzieńnie IPO (pieršasnaje publičnaje raźmiaščeńnie akcyj) z dapamohaj svajoj zamiežnaj kampanii. Niekalki hadoŭ tamu «Jeŭrahandal» navat pravioŭ prezientacyju na Varšaŭskaj fondavaj biržy. A nieŭzabavie zajaviŭ ab žadańni vyjści na Łondanskuju biržu.
Patreba ŭ finansavańni ŭzmacniłasia, kali dachodaŭ z apieracyjnaj dziejnaści pierastała chapać na absłuhoŭvańnie kredytaŭ. Raniej paviedamlałasia, što ŭ 2012-2013 hh. «Jeŭrahandlu» byli adkrytyja kredytnyja linii ŭ rasijskich «Śbierbanku» i «Alfa-Banku» na sumu da 250 młn dalaraŭ. Pavodle dadzienych Minfina, vyručka «Jeŭrahandlu» ŭ 2015 hodzie skłała amal 1,5 młrd dalaraŭ, čysty prybytak — kala 18,5 młn dalaraŭ.
Cisnuć na rytejlera stała pahoršanaja situacyja na ŭnutranym rynku, što adbiłasia na apieracyjnaj dziejnaści. Jak śledstva — stali pastupać skarhi na raściahvańnie raźlikaŭ z pastaŭščykami. Akramia taho, va ŭładalnikaŭ «Jeŭraopta» paŭstali składanaści ŭ sumiežnych biźniesach. Stvoranaja Litvinym i Vasilkam u Litvie sietka kram Fresh market chutka zbankrutavała. Pavodle infarmacyi «Ježiednievnika», niekatoryja kampanii biźniesmienaŭ, jaki pastaŭlali sadavinu i harodninu ź Jeŭropy ŭ RF, paciarpieli ad uviadzieńnia Kramlom charčovaha embarha ŭ žniŭni 2014 hoda.
U «Jeŭrahandli» i IFC admovilisia raskryć detali mahčymaj uhody, spasłaŭšysia na pryvatnaść pieramoŭ.
