Biełaruskaja kalijnaja kampanija: Raźvićcio vytvorčaści na znojdzienym u Kitai radoviščy zojmie praciahły čas
Pieršaha žniŭnia kitajskija ŚMI raspaŭsiudzili infarmacyju, što ŭ pravincyi Cynchaj znojdziena bujnoje radovišča kalijnych solaŭ.
Padčas papiaredniaj vyviedki vyjaŭlena bolš za 156 miljonaŭ ton chłorystaha kaliju. Heta pry tym, što Kitaj štohod impartuje kala 6 miljonaŭ ton.
Ilustracyjnaje fota Vk.com.
Z hetaha abjomu Biełaruś letaś pastaviła ŭ Kitaj bolš za tracinu — 2,3 miljona ton kaliju!
Darečy, sioleta ŭhodu z Kitajem na pastaŭku tolki 1,3 miljona ton (pa canie $219 za tonu, ahułam kala $285 miljonaŭ) padpisali tolki dva tydni tamu — 14 červienia.
Z prośbaj patłumačyć, jak hetaje adkryćcio kitajcaŭ adabjecca na biełaruskim kalijnym biznesie, «Naša Niva» źviarnułasia da Biełaruskaj kalijnaj kampanii.
«Adkryćcio hetaha radovišča — nie navina, — skazali nam u BKK. — Mienavita ŭ hetym rehijonie ŭ asnoŭnym zdabyvajuć kalij u Kitai, i acenka zapasaŭ adpaviadaje acenkam, jakija hučali raniej. U hety momant Kitaj samastojna vyrablaje prykładna 50% kalijnych uhnajeńniaŭ ad ahulnych patreb krainy (pavodle kitajskich krynic — 30%). Adnak kalij — heta vyčarpalny resurs, kalijnyja reziervy pastupova źmianšajucca ŭ pracesie raspracoŭki, a zamiest ich pačynajecca raspracoŭka novych radoviščaŭ. Heta naturalny praces, jaki zabiaśpiečvaje bałans na rynku. Praces raźvićcia vytvorčaści na znojdzienym radoviščy zojmie dosyć praciahły čas».
Taksama ŭ BKK padkreślili, što cana $219 za tonu, jakaja zamacavanaja ŭ sioletniaj uhodzie z Kitajem — heta pośpiech dla Biełarusi, bo kańjuktura rynku i prahnozy analitykaŭ byli kudy bolej piesimistyčnyja.
