Šunievič: Materyjały pa artykule «Najomnictva» źbirajucca na 20 čałaviek, usiaho ŭ Danbasie vajavała sto
BiełTA
Jeŭraradyjo: Prahučała infarmacyja, što MUS zaniaŭsia tymi, chto vajuje na Danbasie…
Ihar Šunievič: Razmovy pra zaviedzienyja spravy pakul niama. Zaraz my zajmajemsia zboram materyjałaŭ i kali budzie dastatkova padstaŭ, to śledstva pavinna budzie albo raspačać kryminalnuju spravu, albo admović u hetym — u zaležnaści ad taho, jak my spracujem. Zaraz idzie praces nazapašvańnia materyjałaŭ. Jon zaviaršajecca, i ŭ samy bližejšy čas materyjały buduć nakiravanyja ŭ śledčyja padraździaleńni.
Jeŭraradyjo: Adkul infarmacyju atrymlivajecie?
Ihar Šunievič: Najpierš, heta adkrytyja krynicy. I druhoje — abjektyŭnyja dadzienyja, jakija ŭ hetych ŚMI (i ŭ tym liku ŭ internecie) znachodziacca —fotazdymki tyja ž. Pravodzicca apytańnie vidavočcaŭ. Karaciej, uvieś nabor tych instrumientaŭ, jaki my vykarystoŭvajem dla zboru źviestak. I zbor hetych materyjałaŭ viadziecca ŭ dačynieńni da hrupy pryblizna ŭ 20 čałaviek.
Jeŭraradyjo: Maje značeńnie dla vas, na čyim baku vajuje biełarus: za Ukrainu ci za tak zvanyja DNR/ŁNR? Ci budzie mieć značeńnie, ci ździajśniaŭ čałaviek padčas znachodžańnia na Danbasie «vajennyja złačynstvy»?
Ihar Šunievič: Dla nas niavažna, na čyim baku vajuje čałaviek — nam važna, što čałaviek parušaje naš biełaruski zakon. Tamu ŭ hrupie, pra jakuju ja kazaŭ, jość i tyja, chto vajuje na baku ŭradu Ukrainy, tak i tyja, chto vajuje na baku DNR/ŁNR. Mnie składana skazać, ci budzie fakt ździajśnieńnia «vajennych złačynstvaŭ» mieć značeńnie dla vyniasieńnia sudovaha vierdyktu… Ja dumaju, što najpierš budzie razhladacca najaŭnaść składu złačynstva «Najomnictva». Kali skład złačynstva pa hetym artykule budzie paćviardžacca, to ja nie vyklučaju, što asudžeńnie pa hetym artykule całkam mahčymaje. A ŭžo forma, u jakoj toje najomnictva ažyćciaŭlałasia, na moj pohlad, budzie mienš prymacca da ŭvahi.
Jeŭraradyjo: Materyjały źbirajucca na tych, chto zaraz znachodzicca na Danbasie, ci i na tych, chto ŭžo viarnuŭsia na radzimu?
Ihar Šunievič: My źbirajem infarmacyju, kab dakazać vinu tych, chto braŭ niezakonny ŭdzieł u bajavych dziejańniach. Tamu lubaja infarmacyja, jakaja siońnia ŭ nas cyrkuluje, u tym liku i ŭ srodkach masavaj infarmacyi, nami ŭličvajecca. I kožnamu epizodu, kožnamu faktu nami budzie dadzienaja pravavaja acenka.
Jeŭraradyjo: Ci jość u vas infarmacyja pra ahulnuju kolkaść biełarusaŭ, jakija biaruć ci brali ŭdzieł u bajavych dziejańniach va Ukrainie?
Ihar Šunievič: Tak. Takich ludziej niašmat — kala 100 čałaviek. Ale, praŭda, heta tolki toje, što nam viadoma. Vy ž razumiejecie, što my nie ŭsio viedajem. Ale heta nie aznačaje, što suprać usich hetych ludziej budzie raspačataja kryminalnaja sprava pa artykule «Najomnictva». Kožnamu budzie dadzienaja pravavaja acenka, zychodziačy z sabranych dokazaŭ viny. Kali śledčyja prymuć rašeńnie, što dastatkova pryčyn, kab pačać kryminalnuju spravu, tady tolki budzie prymacca rašeńnie ab raspačynańni spravy. Kali takich pryčyn budzie niedastatkova, to buduć pravodzicca dadatkovyja apieratyŭna-vyšukovyja mierapryjemstvy, pravieračnyja dziejańni.
