Łahistyčny centr «Jeŭraopta»: 50 trejleraŭ za dzień i zarobak da 17 młn
«Jeŭraopt» pabudavaŭ hihancki sučasny skład pad Baranavičami.
Novy łahistyčny centr «Jeŭraopta» pad Baranavičami.
Sietka kramaŭ «Jeŭraopt» chutka raspaŭzajecca pa krainie, zavajoŭvajučy ciapier užo i rajcentry. Bolš za 150 kramaŭ, u jakich pracujuć bolš za 20 tysiač čałaviek, — «Jeŭraopt» ź jahonymi vysokimi zarobkami staŭ nacyjanalnym fienomienam.
Niekalki miesiacaŭ tamu kampanija zapuściła pad Baranavičami łahistyčny centr, samy sučasny ŭ krainie. Jak arhanizavanaja praca na im?
Usie pielmieni viazuć z Baranavič
Karysnaja płošča łahistyčnaha centra — 24 000 m2, heta jak try futbolnyja pali. «70% terytoryi addadziena pad «ciopły» skład, 20% — pad sadavinu i harodninu, reštu zajmaje skład hłybokaj zamarozki z tempieraturaj minus 18°S. Jość i kamiera daśpiavańnia, dzie štomiesiac 3200 ton zialonych bananaŭ pieratvarajucca ŭ žoŭtyja i sałodkija», — raskazvaje namieśnik hiendyrektara pa łahistycy Andrej Vysocki. 3200 ton za miesiac! Ujaŭlajecie maštab?
Skład hłybokaj zamarozki.
Ciapier, kali łahistyčny centr «Jeŭraopta» vyjšaŭ na poŭnuju mahutnaść, jon moža prymać bolš za 50 trejleraŭ na dzień. Načalnik składavaj słužby Dźmitryj Martysiuk zapeŭnivaje, što praca tut spyniajecca tolki raz na hod — u navahodniuju noč.
Zamarožanaja pradukcyja štodnia razvozicca z łahistyčnaha centra pa ŭsich «Jeŭraoptach» krainy.
«My pastajanna aptymizujem łahistyku. Naprykład, nieŭzabavie zakupim termakantejniery dla palet z zamarožanaj pradukcyjaj. Hetyja kantejniery mohuć zachoŭvać tempieraturu minus 18°S ciaham sutak, tamu ŭ adnym hruzaviku možna budzie pieravozić absalutna ŭsie typy tavaraŭ. Ujavicie, tady adna mašyna dastavić u kramu ŭsio, što ciapier pryvoziać 4—5!» — chvalicca Andrej Vysocki.
«Za hod zvolnilisia tolki siem čałaviek»
U baranavickim łahistyčnym centry siońnia pracuje kala 380 čałaviek, ale kampanija płanuje naniać jašče 70 miascovych žycharoŭ. Dźmitryj Martysiuk raskazvaje, što kampanija doŭha ekśpierymientavała z formami apłaty, pakul nie pryjšła da sistemy matyvacyi supracoŭnikaŭ:
«Kožny supracoŭnik atrymlivaje akład 2 miljony rubloŭ. A jašče jość niaźmienny «hrašovy piroh», jaki dzielicca pamiž supracoŭnikami pa vynikach pracy štomiesiac. Nazirać za svaimi pośpiechami supracoŭniki mohuć na admysłovym manitory, dzie adlustroŭvajecca vypracoŭka i zarobak kožnaha. Realna zarabić kala 8—10 miljonaŭ. Maksimalny zarobak u minułym miesiacy byŭ u štabielora na adnym ź minskich składoŭ — 17 miljonaŭ rubloŭ. Viedajecie, my byli na składach u Šviejcaryi, i tam takija rabotniki atrymlivajuć mienš».
Ekran, na jakim u realnym časie adlustroŭvajecca infarmacyja pra zarobak štabieloraŭ.
Štabielory — rabotniki na śpiecyjalnych mašynach pa pieravozcy hruzaŭ unutry zakrytaj prastory.
Viły kožnaha pahruzčyka abstalavanyja videakamieraj, bo štabieloram davodzicca zdymać palety z 12-mietrovaj vyšyni.
Kiraŭnictva łahistyčnaha centra chvalicca nizkaj ciakučkaj kadraŭ — syšli mienš za 10 rabotnikaŭ za hod. Dźmitryj Martysiuk tłumačyć heta mienavita sistemaj apłaty pracy: «Akramia dobraha zarobku, my i ŭznaharodžvajem svaich supracoŭnikaŭ. U kancy kožnaha hoda dvanaccaci ź ich dastajucca padarunki, jakija možna vybrać samomu, naprykład, televizar ci chaładzilnik».
Raźmiežavanyja linii adhruzki. Na kožnaj linii ŭkamplektavany tavar dla adnaho hruzavika.
«Kažuć, niama robataŭ. A jany tut nie patrebnyja!»
Inviestycyi ŭ budaŭnictva łahistyčnaha centra skłali $25 miljonaŭ. Ekśpiert pa łahistycy Rusłanas Madulevas, jaki pierajšoŭ na pracu ŭ «Jeŭraopt» ź litoŭskaj handlovaj sietki Maxima, aburajecca krytykaj łahistyčnaha centra:
«U internecie pišuć, maŭlaŭ, na składach u Jeŭropie ŭsio aptymizavana, tam paŭsiul robaty, a ŭ «Jeŭraopta» nijakich inavacyj niama. Ale jość važnyja adroźnieńni. U Jeŭropie darahaja ziamla, i tam składy budujuć uvyšyniu. Karysnaja vyšynia hetaha centra — 14 m, na takoj vyšyni možna pracavać viłačnym pahruzčykam. A była b vyšynia 25 m — i ŭsio, niebiaśpieka dla ludziej, bo adzin nieaściarožny ruch — i moža zdarycca trahiedyja. Nieabchodna ŭličvać i typ tavaru. U nas usio zachoŭvajecca paletami: źniaŭ paletu, pastaviŭ paletu. Na składzie aŭtadetalaŭ situacyja inšaja: ujavicie 100 tysiačaŭ najmieńniaŭ, kožnaja ŭ svajoj skryni. Ludzi tam prosta zhubiacca. Dumajecie, kali b nam byli bolš vyhadnyja robaty, my b ich nie pastavili? Usio dobra praličana».
Kamiery daśpielvańnia bananaŭ, u jakoj zialonaja sadavina śpieje ciaham niekalkich dzion.
«Praterminoŭka zdarajecca, ale nie čaściej, čym u astatnich
Niadaŭna ŭ siecivie źjaviłasia videa nibyta ź minskaha składa hłybokaj zamarozki №73 «Jeŭraopta». Vaśmichvilinny siužet byŭ napoŭnieny niepryvabnymi kadrami praduktaŭ, raskidanych pa ziamli. Aŭtary rolika śćviardžali, što takaja situacyja — štatnaja dla handlovaj sietki. Ci praŭda heta?
Pradstaŭniki «Jeŭraopta» kažuć, što na videa sapraŭdy jość niekalki kadraŭ ź ich składa — minułym letam kamiera nie vytrymała nadzvyčajnaj śpioki, i zamarožanyja pradukty sapsavalisia. Ich daviałosia ŭtylizavać.
«My pastajanna kantralujem jakaść praduktaŭ. Łahistyčny centr abstalavany sistemaj sihnalizacyi ab praduktach, u jakich padychodzić da zakančeńnia termin prydatnaści. A poŭnaja źmiena tavaru adbyvajecca kožnyja 10—15 dzion. U nas zanadta vysokija abjomy prodažaŭ, kab tavar zalažaŭsia na palicach», — kaža Vysocki.
Partyi sadaviny i harodniny ź vialikim pracentam sapsavanych pładoŭ ci adpraŭlajucca na pieraborku, ci viartajucca pastaŭniku.
Na schoviščy sadaviny možna ŭbačyć i sapsavanyja płady. Asabliva mnoha pakrytych ćvillu limonaŭ. Andrej Vysocki supakojvaje: skryni ź limonami nie pajeduć u kramu. «Praz nas prachodziać vialikija abjomy sadaviny i harodniny. Viadoma, siarod ich jość i hniłyja. Kali kolkaść sapsavanaha tavaru nievialikaja, sadavinu i harodninu sarcirujuć u kramie. Kali pracent niekandycyjnych pładoŭ vysoki, ich adpraŭlajuć u Minsk na pieraborku, a potym razvoziać pa kramach. Kali ŭsio zusim drenna, partyja viartajecca pastaŭščyku. Što ź joju rabić dalej — jaho hałaŭny bol», — kaža jon.
TAA «Jeŭrahandal»
U 1990-ia kampanija zajmałasia aptovym handlem, paśla skancentravałasia na raźvićci sietki kramaŭ. «Jeŭrahandal» kantralujuć biznesoŭcy Siarhiej Litvin i Uładzimir Vasilka, pryčym bolš za 10 hadoŭ jany žyvuć za miažoj i navat mierkavali atrymać palityčny prytułak u Polščy. U Biełarusi na ich była zaviedzienaja kryminalnaja sprava, jakaja, adnak, vynikaŭ nie dała. U 2012-m kampanija nabyła bank, aproč taho, adkryvaje kramy ŭ Rasii.
«Jeŭrahandal» — samaja prybytkovaja pryvatnaja kampanija Biełarusi z adkrytaj spravazdačnaściu. Za treci kvartał 2013ha čysty prybytak skłaŭ $34 miljony.
