«Stary Olsa»: Nas abakrali ruskija nacyjanalisty

Muzyka hurtu «Stary Olsa» biez dazvołu skarystanaja ŭ filmie, źniatym žurnalistami rasijskaj «Komsomolskoj pravdy». U im idzie razmova pra siamju Hiermana Ścierlihava, adnaho ź pieršych rasijskich miljanieraŭ, viadomaha svaimi radykalnymi nacyjanalistyčnymi pohladami.

Lidar biełaruskaha hurta Źmicier Sasnoŭski aburany tym, što ich muzyka skarystanaja dla prapahandy rasijskaha nacyjanalizmu. «Heta čarhovy fakt vykarystańnia našaj muzyki ŭ absalutna supraćlehłych metach. My źjaŭlajemsia ščyrymi patryjotami Biełarusi i prykładajem šmat namahańniaŭ da adradžeńnia našaj staroj muzyki, a tamu nie možam spakojna tryvać fakt vykarystańnia hetaj muzyki ŭ prapahandzie rasijskaha nacyjanalizmu, jaki źniščaŭ i praciahvaje źniščać našu rodnuju kulturu», — zajaviŭ Źmicier Sasnoŭski sajtu budzma.org.

Heta nie pieršy vypadak, kali muzyku biełaruskaha hurta litaralna kraduć rasijcy i vykarystoŭvajuć u svaich metach.

Tak, niekalki hod tamu tavarystva «Rodnoviery» vydała šerah kampazicyj «Staroha Olsy» pad nazvaj «Drievnierusskaja muzyka». Telekanał NTV biez dazvołu muzykaŭ skarystaŭ ich tvory dla ahučvańnia pieradačy pra Kaŭkaz, a adna z rasijskich kampanij niezakonna pradavała rynhtony «olsaŭ». Źmicier Sasnoŭski kaža, što raniej u takich kanfliktnych situacyjach dapamahaŭ razabracca Nacyjanalny centr intelektualnaj ułasnaści.

Prynamsi, prodaž dyskaŭ «olsy» pad šyldaj «Drievnierusskaja muzyka» i raspaŭsiud rynhtonaŭ atrymałasia prypynić.

Ale, jak viadoma, kiraŭnictva NCIU zvolniłasia na pačatku miesiaca ŭ poŭnym składzie. «Faktyčna ciapier biełaruskija muzyki nie majuć nijakaj abarony, i raźbiracca z takim vypadkami stała bolš składana», — kaža lidar «Staroha Olsy»

Siarhiej Budkin, budzma.org

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH