Tarancina zdymie film pra Kaściušku

Amierykanski režysior Kviencin Tarancina biarecca za zdymki filma pra nacyjanalnaha hieroja Biełarusi i Polščy Tadevuša Kaściuški. Za asnovu novaj stužki ŭziaty siužet, pryśviečany amierykanskamu epizodu žyćcia nacyjanalnaha hieroja Biełarusi i Amieryki.

Jak viadoma, Tadevuš Kaściuška ŭ 1776—1783 hh. žyŭ u Amierycy i braŭ udzieł u vajnie za niezaležnaść Złučanych Štataŭ. Jon byŭ hałoŭnym inžynieram armii Poŭnačy i staŭ — u prostym i pieranosnym sensach — adnym z architektaraŭ pieramohi nad Anhlijaj, zbudavaŭšy cytadel va Uest-Pojncie.

Za zasłuhi Kaściuški Kanhres ZŠA nadaŭ jamu zvańnie bryhadnaha hienierała, amierykanskaje hramadzianstva i padaryŭ ziamielny nadzieł. Praŭda, paśla Kaściuška viarnuŭsia ŭ Reč Paspalituju, dzie ŭznačaliŭ niezaležnickaje paŭstańnie.

«Mianie vielmi zacikaviła hetaja asoba. U ZŠA zaŭsiody z pašanaj stavilisia da emihrantaŭ», — cytuje słovy Tarancina Los Angeles Times.

Darečy, sam režysior maje irłandska-italjanskija karani.

Dla Tarancina, jaki na tym tydni adśviatkavaŭ50-hadovy jubilej, heta nie pieršy zvarot da historyi ZŠA. U filmie «Džanha Vyzvaleny» 2012 hoda byŭ zakranuty piaredadzień Hramadzianskaj vajny ŭ ZŠA i admieny rabstva.

Film «Kaściuška» maje vyjści na ekrany da 2016 h., kali šyroka budzie adznačacca 240-ja hadavina Niezaležnaści ZŠA. Niahledziačy na surjoznaść temy, režysior nie źbirajecca adychodzić ad svajoj firmovaj stylistyki.

Tarancina zdymaje filmy prykładna raz na try hady. Miarkujecca, što rolu Tadevuša Kaściuški syhraje Kianu Ryŭz.

Na rolu pieršaha prezidenta ZŠA Džordža Vašynhtona Tarancina miarkuje zaprasić Krystafa Valca — doktara Kinha Šulca z «Džanha».

* * *

Kviencin Tarancina — suśvietna viadomy režysior, jarki pradstaŭnik postmadernizmu ŭ kiniematohrafie. Jaho filmy vyznačajucca nieliniejnaj strukturaj apaviadańnia, pieraasensavańniem kulturna-histaryčnaha pracesu, vykarystańniem hatovych formaŭ i estetyzacyi hvałtu.

Suśvietnuju viadomaść atrymaŭ paśla vychadu karciny «Kryminalnaje čytvo» (1994), jakaja pryniesła jamu «Załatuju palmavuju halinu» Kanskaha kinafiestyvalu, a taksama premii «Oskar» i «Załaty hłobus» za najlepšy scenar.

Jon taksama źniaŭ «Šalonyja sabaki» (1992), «Džeki Braŭn» (1997), «Zabić Biła» (u dźviuch častkach, 2003–2004), «Dokaz śmierci» (2007), «Biassłaŭnyja vyradki» (2009) i «Džanha vyzvaleny» (2012). Za «Džanha» Tarancina atrymaŭ «Oskara» ŭ naminacyi «najlepšy scenar».

* * *

Hety materyjał byŭ apublikavany 1 krasavika.

nn.by

Chočaš padzialicca važnaj infarmacyjaj
ananimna i kanfidencyjna? Pišycie redaktaru
«Našaj Nivy» ŭ TH