Супраць Ціханоўскай і Латушкі распачалі справу за «самавольнае прысваенне ўлады службовай асобы»
Следчы камітэт распачаў справу па артыкуле 382 Крымінальнага кодэкса «Самавольнае прысваенне звання ці ўлады службовай асобы» супраць Святланы Ціханоўскай і Паўла Латушкі. Максімальнае пакаранне па ім — 2 гады калоніі.
Гэта рэакцыя ўладаў на шырокае прадстаўніцтва Ціханоўскай і Латушкі за мяжой.
«Абвінавачаныя Ціханоўская і Латушка па ўзгадненні з іншым удзельнікамі змовы праз парушэнне патрабаванняў Канстытуцыі Беларусі стварылі псеўдаорганы дзяржаўнай улады і ўпраўленняў і прадстаўніцтваў Рэспублікі Беларусь за мяжой. І, працягваючы свае злачынныя дзеянні, уступілі ў перамовы з прадстаўнікамі замежных дзяржаў і міжнародных арганізацый», — заявіў афіцыйны прадстаўнік СК Сяргей Кабаковіч у эфіры «Беларусь 1».
Гэта не першая крымінальная справа і ў Святланы Ціханоўскай, і ў Паўла Латушкі: абое яны фігуранты справы аб «стварэнні экстрэмісцкага фарміравання з мэтай захопу дзяржаўнай улады неканстытуцыйным шляхам». Ціханоўская да таго ж абвінавачваецца ў «падрыхтоўцы тэракту групай асоб».