Паветраныя сілы Украіны знішчылі 16 з 22 расійскіх «Шахедаў» і 3 з 6 «Калібраў»
Гэтай ноччу Расія зноў абстраляла Украіну, у тым ліку Кіеў.
Расія атакуе Украіну ракетамі і дронамі па начах. Скрыншот
На працягу начной атакі сіламі і сродкамі супрацьпаветранай абароны паветраных камандаванняў «Цэнтр», «Захад» і «Поўдзень» Паветраных сіл Украіны знішчаны тры крылатыя ракеты і 16 ударных дронаў.
Акупанты атакавалі Украіну з паўночнага і паўднёва-ўсходняга кірункаў ударнымі дронамі «Shahed-136/131» і крылатымі ракетамі «Калібр» з караблёў у Чорным моры.
Усяго былі зафіксаваны пускі 22 «Шахедаў» і шасці «Калібраў».
У выніку начнога ўдару па горадзе Крывы Рог Днепрапятроўскай вобласці пашкоджанні атрымалі памяшканні прыватнага прамысловага прадпрыемства і адміністрацыйны будынак, два чалавекі атрымалі раненні.
Таксама паведамлялася, што ў Львове падчас паветранай трывогі прагрымеў выбух — улады аб'явілі аб працы СПА ў вобласці.
Кіеўскія ўлады паведамілі, што сілы супрацьпаветранай абароны гэтай ноччу знішчылі ўсе варожыя цэлі, якія рухаліся ў напрамку сталіцы, піша «Украінская праўда».
