Заўтра вынесуць прысуд Паўлу Белавусу
Прысуд агучаць у Мінскім гарадскім судзе ў 14:30, паведаміла ў фэйсбуку жонка Паўла Кацярына. Паўлу пагражае да 15 гадоў зняволення.
Яна таксама просіць падтрымаць Паўла лістамі, тэлеграмамі ці грашовым пераводам па адрасе: СІЗА-1, 220030, г. Мінск, вул. Валадарскага, 2.
Працэс, які пачаўся 20 лютага, вядзе суддзя Жанна Брысіна.
Першапачаткова суд быў адкрыты, але на самым пачатку судовага пасяджэння дзяржаўны абвінаваўца заявіў хадайніцтва аб разглядзе справы ў закрытым рэжыме «з мэтай прадухілення разгалошвання інфармацыі, размешчанай у крыніцах, прызнаных экстрэмісцкімі».
Як паведамляў на пачатку студзеня былы начальнік упраўлення Следчага камітэта па Мінску Сяргей Паско, у 2011 годзе «абвінавачаны для пошуку аднадумцаў пачаў трансляваць патрэбную яму інфармацыю ў масы».
«Пад выглядам культурна-гістарычнага развіцця ў розных агульнадаступных сацыяльных сетках і на сайтах ён распаўсюджваў ідэі беларускага нацыяналізму, мэтай якіх з'яўлялася змена дзяржаўнай улады ў Беларусі. Абвінавачваны зарэгістраваўся ў якасці індывідуальнага прадпрымальніка і заснаваў таварыства з абмежаванай адказнасцю (крама па анлайн- і афлайн-продажы тавараў), пасля чаго пачаў праводзіць розныя масавыя мерапрыемствы», — казаў у студзені Паско.
Па выніках расследавання Белавусу выстаўлена абвінавачанне па наступных артыкулах Крымінальнага кодэкса:
— ч. 1 арт. 356 (здрада дзяржаве);
— ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак);
— ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь);
— ч. 1 арт. 361-1 (кіраўніцтва экстрэмісцкім фармаваннем).
На маёмасць Паўла Белавуса наклалі арышт на агульную суму больш за 50 тысяч рублёў.
Чытайце таксама:
