Сярод затрыманых падчас аблавы ў Гомелі — вядомы сталічны рэйвер
Яго вінавацяць у ахвяраваннях на «Байсол» і падпісках на «экстрэмісцкія» рэсурсы.
Фота: 34mag.net, старонкі «Укантакце» затрыманых і тэлеграм-канал ГУБАЗіКа
Сёння ГУБАЗіК паказаў шасцярых затрыманых у Гомелі за апошні час. Адным з затрыманых аказаўся 33-гадовы Павел Данкаў — стваральнік рэйв-праекта «МЕЧТА», які выступае пад псеўданімам Morgotika.
Павел Данкаў. Фота: ягоная старонка «Укантакце»
Данкаў скончыў факультэт міжнародных адносінаў БДУ, але займаўся арганізацыяй вечарын з 2011 года. У лютым 2016-га ён стварыў праект «МЕЧТА», пад дахам якога арганізоўваў рэйв-вечарыны — у Мінску яны часта праходзілі на Кастрычніцкай вуліцы. Апошняя вечарына праекта прайшла паўгода таму ў Гомелі.
Яго вінавацяць у ахвяраваннях на «Байсол» і падпісках на «экстрэмісцкія» рэсурсы.
Яшчэ адным затрыманым стаў 24-гадовы гомельскі фатограф Павел Буланаў.
Павел Буланаў. Фота: ягоная старонка «Укантакце»
Хлопец рабіў шмат фота і для дзяржаўных прадпрыемстваў: да прыкладу, для кнігі да 20-годдзя «Магілёўаўтадора» або выдання да 50-годдзя Мінскага маторнага завода. Таксама Павел захапляецца падарожжамі па Беларусі, асабліва на ровары, аматар рыбалкі.
Яго вінавацяць у тым, што ён «распаўсюдзіў экстрэмісцкую сімволіку».
Трэцім вядомым затрыманым стаў 22-гадовы Ігар Ступакоў з Буда-Кашалёва.
Ігар Ступакоў. Фота: канал ГУБАЗіКа
Ігар — сірата. Вядома, што ён мае катэгорыю кіроўцы С і ў 2019-м шукаў працу кіроўцам. Чым ён займаецца цяпер — невядома.
Яго вінавацяць у «падпісцы на экстрэмісцкі тэлеграм-канал» — у сюжэце ГУБАЗіКа паказваецца скрыншот з канала «Чай з малінавым варэннем».
Яшчэ аднаго затрыманага, імя якога невядомае, вінавацяць у тым, што ён у 2020-м напісаў каментар, сутнасць якога зводзіцца да таго, што людзям варта пратэставаць.
Невядомы, якога вінавацяць у падпісках на «экстрэмісцкія» чаты і пакіданні там каментара
Імёны астатніх дваіх мужчын, паказаных у відэа, таксама невядомыя.
«Наша Нiва» — бастыён беларушчыны
ПАДТРЫМАЦЬЧытайце таксама:
Дзяўчыну затрымалі за каментары. Вось як яе адшукалі
Як выдаліць акаўнт у Telegram і стварыць яго нанова на віртуальны нумар — пакрокавы гайд
Тлумачым, якім чынам сілавікі знаходзяць карыстальнікаў Telegram і як гэтага пазбегнуць
