Сем'ям мабілізаваных у Маскве дадуць вяндліну і стронгу за кошт гарадскога бюджэту
Дзяржустанова ўрада Масквы аб'явіла конкурсы на пастаўку «харчовых набораў» і «падарункавых чайных набораў з прысмакамі» для «членаў грамадскіх арганізацый і членаў сем'яў мабілізаваных». Дакументы апублікаваныя на сайце дзяржзакупак, звярнула ўвагу Tayga.info.
У харчовы набор увайшлі вяндліна ў вакуумнай упакоўцы (300 гр.), стронга ў вакуумнай упакоўцы (200 гр.), кавалак сыру 45% тлустасці, пакуначак цукерак (200 гр.), 100 грамаў чорнай гарбаты і 95-грамовая банка з распушчальнай кавай.
Такіх пасылак спатрэбілася 800 (па $27 за адну). У «салодкі» набор увайшлі чай, кава, торт «мядовік», зефір у шакаладзе і ўпакоўка з дзевяці відаў печыва (вагой 345 грамаў або больш). Улады замовілі 320 такіх набораў (па 1,25 тыс. за кожны). Кантракты амаль на $26500.
Грошы выдзеляць з бюджэту Масквы.
