Апошні буйны банк Літвы спыняе працу з Беларуссю і Расіяй
Літоўскі Šiaulių bankas аб'явіў аб спыненні правядзення плацяжоў у і з Расіі ды Беларусі, а таксама ўсіх плацяжоў у расейскіх рублях. Пра гэта гаворыцца на сайце банка, піша Delfi.lt.
Фота: Judita Grigelytė / Verslo Žinios
Рашэнне звязана з санкцыямі супраць Беларусі і Расіі. У банку падкрэсліваюць, што для зручнасці кліентаў ім далі дастаткова часу для пераходу на іншыя рынкі і зніжэння сваёй залежнасці ад падсанкцыйных краін, але далейшыя рызыкі для банка непрымальныя.
«З 15 жніўня мы не будзем апрацоўваць плацяжы ў расійскіх рублях, незалежна ад краіны прызначэння. З 1 верасня мы не будзем апрацоўваць плацяжы ў/з Расіі і Беларусі ў любой валюце», — заявілі ў банку.
Выключэнні могуць быць зробленыя толькі па папярэднім узгадненні для выпадкаў, калі плацяжы звязаныя з гуманітарнымі мэтамі ці патрэбныя для забеспячэння дзяржаўных функцый.
Šiaulių bankas заставаўся апошнім сярод буйных банкаў Літвы, хто яшчэ праводзіў плацяжы ў Беларусь і Расію. У маі такія плацяжы спынілі Swedbank і SEB bankas, у канцы чэрвеня — банк Luminor.
