Нецвярозы гарадзенец на хуткасці 178 км/г забіў двух чалавек. Яму далі 10 гадоў калоніі
Жыхар Гродна асуджаны на 10 гадоў пазбаўлення волі ў калоніі агульнага рэжыму за п'янае ДТЗ на хуткасці 178 км/г. Ён пазбаўлены права кіраваць транспартнымі сродкамі на 8 гадоў, паведамляе reform.by.
Фота: ДАІ
Такі прысуд вынес суд Ленінскага раёна Гродна. Ён яшчэ не ўступіў у сілу і можа быць абскарджаны.
Паводле матэрыялаў справы, мужчына 5 сакавіка гэтага года каля 8 раніцы ў нецвярозым стане ехаў на BMW 745Li ў Гродне. Яго паспрабавалі спыніць супрацоўнікі ДАІ. Кіроўца не падпарадкаваўся іх патрабаванням і паспрабаваў з'ехаць. Сыходзячы ад пераследу, ён паспрабаваў праскочыць скрыжаванне на чырвонае святло і ўрэзаўся ў Dacia Sandero, якая на зялёнае святло выконвала левы паварот. У выніку сутыкнення кіроўца і пасажыр Dacia загінулі. У момант сутыкнення хуткасць BMW складала 178 км/г.
Абвінавачаны прызнаў віну ў поўным аб'ёме.
З яго таксама спагнана ў кошт кампенсацыі маральнай шкоды на карысць пацярпелых 180 тысяч рублёў.
