Біла Клінтана шпіталізавалі з заражэннем крыві
Былы прэзідэнт ЗША (1993-2001) Біл Клінтан шпіталізаваны, паведамляе CNN. Паводле звестак тэлеканала, Клінтана даставілі ў адну з медустаноў Каліфорніі «ў сувязі з інфекцыяй, не звязанай з COVID-19».
Reuters.com
Па словах афіцыйнага прадстаўніка Клінтана, 75-гадовы палітык «ідзе на папраўку» і «знаходзіцца ў добрым настроі».
CNN удакладняе, што прычынай шпіталізацыі стала заражэнне крыві (сепсіс). Клінтана даставілі ў бальніцу ў аўторак з-за пагаршэння самаадчування.
«Яго лечаць пры дапамозе антыбіётыкаў, і дактары сцвярджаюць, што ён рэагуе на іх станоўча», — гаворыцца ў сюжэце.
Журналісты тэлеканала паведамілі са спасылкай на дактароў і прадстаўнікоў экс-прэзідэнта, што Клінтана могуць выпісаць у суботу, 16 кастрычніка.
Палітык раней перанёс дзве аперацыі на сэрцы: у 2004 і 2010 гадах.
