Новы рэкорд: у Літве затрыманыя яшчэ 160 нелегалаў з Беларусі
З раніцы суботы да раніцы нядзелі літоўскія памежнікі, па папярэдніх даных, затрымалі 160 мігрантаў з Беларусі, што незаконна перайшлі мяжу, піша Delfi.
Трэці дзень запар замежнікі, якія спрабуюць нелегальна трапіць у Літву, часцей за ўсё выбіраюць шляхі праз тэрыторыю Друскеніцкага самакіравання.
З раніцы суботы да раніцы нядзелі супрацоўнікі затрымалі 160 мігрантаў.
Многія мігранты, затрыманыя памежнікамі ў Друскеніках, распавядаюць падобныя гісторыі пра тое, чаму выбралі Літву для сваіх нелегальных паездак. Яны нібыта вучыліся ў вышэйшых навучальных установах Гродна, а нядаўна мясцовая ўлада ўвяла новую плату для такіх студэнтаў. Яны таксама нібыта былі выселеныя са студэнцкіх інтэрнатаў і вымушаныя былі пакінуць Беларусь. Такія мігранты кажуць, што з-за блізкасці Гродна да Літвы яны выбралі гэтую краіну, а не, напрыклад, Польшчу.