Пад расійскую забарону трапілі «Беллакт» і рагачоўская згушчонка
Федэральная служба па ветэрынарным і фітасанітарным наглядзе (Рассельгаснагляд) увёў часовую забарону на ўвоз малочнай прадукцыі трох беларускіх прадпрыемстваў.
Як паведамляецца на сайце ведамства, гаворка ідзе пра Ваўкавыскі ААТ «Беллакт», ААТ «Рагачоўскі малочна-кансервавы камбінат» і ВУП «Калінкавіцкі малочны камбінат».
Такое рашэнне было прынята «ў сувязі са шматлікімі парушэннямі патрабаванняў Еўразійскага эканамічнага саюза і Расіі ў прадукцыі згаданых прадпрыемстваў». Абмежаванні пачнуць дзейнічаць ад суботы, 13 жніўня.
18 ліпеня Рассельгаснагляд спыніў увоз на тэрыторыю Расіі больш за 300 тон сухога малака і малочнай прадукцыі сямі беларускіх прадпрыемстваў, у тым ліку «Калінкавіцкага малочнага камбіната», «Слуцкага сыраробнага камбіната» і «Савушкіна прадукта».
