Ramančuk asudziŭ «radykałaŭ», uskłaŭ vinu za «biesparadki» na Statkieviča, Sańnikava, Rymašeŭskaha
«A.Sańnikavu, padahravanamu jahonaj žonkaj I.Chalip, vielmi chaciełasia sarvać dalikatny dyjałoh, jaki zaradžaŭsia pamiž Biełaruśsiu i mižnarodnaj supolnaściu».
A 8.00 20 śniežnia kandydat u prezidenty ad Abjadnanaj hramadzianskaj partyi Jarasłaŭ Ramančuk raspaŭsiudziŭ zajavu nastupnaha źmiestu:
«19 śniežnia 2010 hoda adbyłasia demanstracyja na Kastryčnickaj płoščy Mienska. Dadzienaje mierapryjemstva płanavałasia vyklučna jak mirny, jak vyraz dumki hramadzian.
Na žal, padčas mitynhu na Kastryčnickaj płoščy M.Statkievič, A.Sańnikaŭ i V.Rymašeŭski zaklikali i paviali ludziej na płošču Niezaležnaści. Tam imi byli spravakavanyja biesparadki i ažyćcioŭlena sproba zachopu budynka Doma ŭrada.Pad pahrozaj apynulisia žyćci tysiač čałaviek.
Ja, kandydat u prezidenty Jarasłaŭ Ramančuk, asudžaju zakliki da dziejańniaŭ, jakija parušajuć mirny charaktar praviadzieńnia masavych akcyj. Padziei nočy 19 śniežnia pastavili pad pahrozu žyćcio ludziej.
A.Sańnikavu, padahravanamu jahonaj žonkaj I.Chalip, vielmi chaciełasia sarvać dalikatny dyjałoh, jaki zaradžaŭsia pamiž Biełaruśsiu i mižnarodnaj supolnaściu.
Ja razam z Anatolem Labiedźkam, staršyniom Abjadnanaj hramadzianskaj partyi, nieadnarazova sprabavali pierakanać A.Sańnikava i M.Statkieviča admovicca ad płanaŭ radykalnych dziejańniaŭ, bo ja ŭpeŭnieny, što revalucyi ŭ Biełarusi rujnujuć demakratyju. Masavyja akcyi z užyvańniem siły nie zdolnyja stvaryć atmaśfiery dla paŭnavartaha hramadskaha dyjałohu».
«Naša Niva» źviarnułasia ŭštab-kvateru Abjadnanaj hramadzianskaj partyi, kab pierapeŭnicca, što zajava. «Tak, zajava praŭdzivaja», — adkazali nam.
Tym časam siem inšych kandydataŭ u prezidenty — Niaklajeŭ, Sańnikaŭ, Rymašeŭski, Statkievič, Kastusioŭ, Us, Michalevič — byli zatrymany i znachodziacca ŭ nieviadomym miescy. Dastavierna viadoma pra žorstkaje źbićcio čatyroch ź ich — Niaklajeva, Sańnikava, Rymašeŭskaha, Kastusiova.
* * *
Siońnia rankam Jarasłaŭ Ramančuk vystupiŭ z zajavaj, u jakoj asudziŭ dziejańni Andreja Sańnikava, Vitala Rymašeŭskaha i Mikoły Statkieviča. Zajavu małankava raspaŭsiudzili dziaržaŭnyja ŚMI. «Naša Niva» źviarnułasia da byłoha kandydata pa kamientar.
«Ja kažu pra toje, što Niaklajeŭ, Sańnikaŭ, Statkievič pavinny adkazać za svaje dziejańni. Akcyja pavinna była być praviedziena zhodna z raniejšymi damoŭlenaściami. My pavinny byli sabracca na Kastryčnickaj płoščy i tam mirna čakać vynikaŭ vybaraŭ. Adnak biez kansultacyj z maim štabam, sa mnoj, było vyrašana iści da Domu urada», — raspavioŭ karespandentu «NN» Jarasłaŭ Ramančuk.
Palityk taksama dadaŭ, što ličyć dziejańni apazicyi na płoščy Niezaležnaści pravakacyjnymi: «Nu, pajšli pa praśpiekcie. Nu, zaleźli na Lenina… I što dalej? Ja taksama byŭ tam. Bačyŭ, što płana dziejańniaŭ nie było. Hetyja emacyjnyja rečy i skłali padmurak dla biesparadkaŭ».
Jarasłaŭ Ramančuk taksama raspavioŭ, što jamu paviedamili ab płanach uładaŭ «razabracca z palityčnymi partyjami», pradstaŭniki jakich viečaram 19 śniežnia udzielničali ŭ arhanizacyi akcyi pratestu. «Mnie raspaviali, što ŭłady źbirajucca začynić palityčnyja partyi. Kab vyratavać situacyju, ja i zrabiŭ adpaviednuju zajavu. Ja liču, što zaraz treba vyzvalić zatrymanych ludziej i pravieści rasśledavańnie, va ŭsim razabracca», — raspavioŭ «NN» Jarasłaŭ Ramančuk.
