Sierhiejenka aficyjna pierastaŭ być kiraŭnikom Administracyi
Łukašenka padpisaŭ ukazy, u adpaviednaści ź jakimi šerah słužbovych asob vyzvalajucca ad zajmanych pasad, piša Puł pieršaha.
Ihar Sierhiejenka. Fota: BiełTA
Ihar Sierhiejenka ŭ adpaviednaści z artykułam 84 Kanstytucyi Respubliki Biełaruś vyzvaleny ad pasady kiraŭnika Administracyi ŭ suviazi ź pierachodam na vybarčuju pasadu słužboŭcy. Jon staŭ staršynioj Pałaty pradstaŭnikoŭ, pierad hetym staŭšy deputatam.
Na toj ža padstavie vyzvalenyja ad pasad ministarka pracy i sacyjalnaj abarony Iryna Kaścievič, pamočnik Łukašenki — inśpiektar pa Minsku Alaksandr Barsukoŭ, dyrektar Nacyjanalnaha centra zakanadaŭstva i pravavych daśledavańniaŭ Vadzim Ipataŭ, rektar Akademii kiravańnia Viačasłaŭ Daniłovič.
Taksama ŭ adpaviednaści z artykułam 84 Kanstytucyi hienierał-major Hienadź Lepiaško vyzvaleny ad pasady načalnika ŭstanovy adukacyi «Vajskovaja akademija Respubliki Biełaruś», a hienierał-major justycyi Andrej Lis — ad pasady načalnika ŭpraŭleńnia Śledčaha kamiteta pa Minskaj vobłaści. Imi prypyniena adpaviedna vajskovaja słužba i słužba ŭ Śledčym kamitecie ŭ suviazi z vybrańniem deputatami Pałaty pradstaŭnikoŭ.
U adpaviednaści z punktam 10 artykuła 84 i artykułam 145 Kanstytucyi Respubliki Biełaruś Mikałaj Maratajeŭ vyzvaleny ad pasady namieśnika staršyni i sudździ Homielskaha abłasnoha suda ŭ suviazi z abrańniem na inšuju pasadu. Jon taksama vyklučany sa składu prezidyuma Homielskaha abłasnoha suda.
Čytajcie taksama:
Abrali novaha staršyniu Pałaty pradstaŭnikoŭ. Adzinahałosna i bieź intryhi
Pieršaje pasiadžeńnie «Usiebiełaruskaha narodnaha schodu» zapłanavali na kaniec krasavika
