U Biełarusi zatrymali siem hramadzian Indyi bieź viz. Ich pieradali Rasii, a taja adpraviła ich na vajnu
Indyjski telekanał NDTV apublikavaŭ videazvarot 7 svaich suajčyńnikaŭ, jakich prymusova adpravili ŭ rasijskuju armiju vajavać suprać Ukrainy. Aŭtary zvarotu zajaŭlajuć, što ich vymanili ŭ Biełaruś, dzie paśla zatrymali i pahražali turmoj za admovu iści na front.
Hramadzianie Indyi, jakich rasiejcy prymušajuć vajavać suprać Ukrainy, zapisali videazvarot sa skarhami, dzie ŭ tym liku raspaviali pra svajo zatrymańnie ŭ Biełarusi. Skrynšot ź videa, apublikavanaha indyjskim telekanałam NDTV
Hrupa maładych ludziej ź Indyi zapisała videazvarot da indyjskaha ŭrada z prośbaj ab dapamozie ŭ viartańni dadomu z Ukrainy, kudy ich prymusova adpraviła vajavać Rasija.
Tekst zvarotu začytaŭ 19-hadovy chłopiec pa imieni Charš — jon razam ź inšymi suajčyńnikami byŭ apranuty ŭ vajskovuju formu, padobnuju na rasijskuju.
Pa słovach Charša, jon razam ź siabrami pryjechaŭ u Rasiju 27 śniežnia na śviatkavańnie Novaha hoda. U ich na toj momant była dziejnaja rasijskaja viza na 90 dzion. Ale na momant jaje zakančeńnia chłopcaŭ zaprasiŭ u Biełaruś «niejki turystyčny ahient».
«Ahient prapanavaŭ advieźci nas u Biełaruś, ale my nie viedali, što tudy nam patrebnaja viza. Kali my pryjechali ŭ Biełaruś bieź vizy, ahient paprasiŭ u nas bolš hrošaj, a paśla źnik. Pravaachoŭniki złavili nas i zatym pieradali rasijskim uładam, jakija prymusili nas padpisać niejkija dakumienty. Ciapier nas prymušajuć vajavać suprać Ukrainy», — raskazaŭ Charš na videa.
Svajaki Charša ŭ kamientarach da NDTV adznačyli, što rasijskija ŭłady zabrali ŭ chłopca pašpart i pahražali 10 hadami turmy za admovu iści na front.
«Charš nie razumieŭ sutnaści dakumientaŭ, jakija jamu byli prymusova dadzieny na podpis, bo jany byli na ruskaj. Paśla hetaha jon prajšoŭ nievialikuju vajskovuju padrychtoŭku i byŭ adpraŭleny ŭ Danieckuju vobłaść. Ciažka skazać, ci vyžyvie jon», — raspaviali telekanału NDTV svajaki Charša i paprasili, kab urad Indyi chutčej vyratavaŭ chłopca.
Siamja jašče adnaho chłopca ź videazvarota zajaviła, što dakumienty ab adpraŭcy na front prymušali padpisvać jašče ŭ Biełarusi. U ich havorycca, što chłopcy albo prymajuć turemnaje źniavoleńnie na 10 hadoŭ, albo ŭstupajuć u rasijskuju armiju.
Telekanał NDTV padkreśliŭ, što ŭ padobnaj situacyi znachodziacca kala 20 hramadzian Indyi, jakich pad roznymi padstavami zaprašajuć u Rasiju (asabliva pa pracy) i zatym padmanam prymušajuć vajavać.
Čytajcie taksama:
Jak biełarusy dapamahali asnaščać rasijskuju vajskovuju mašynu zachodnim abstalavańniem
U Navapołacku mužčynu aryštavali za łajk pad intervju Žyrynoŭskaha
«Navat svajho hatovyja źmiašać z brudam». Pratasievič vylez na BT z kryŭdami na byłych kaleh
