«My havorym na adnoj movie». Homielskija prapahandysty dali słova ŭkrainskamu dezierciru
Homielskija prapahandysty raskazali pra čarhovaha ŭkrainca, jaki ŭciok ad mabilizacyi, piša «Štodzień». Havorka idzie pra ŭradženca Žytomirskaj vobłaści, 40-hadovaha Ryhora.
Fota: Homielskaja praŭda
U materyjale abłasnoj haziety «Homielskaja praŭda» raskazvajecca pra toje, što ŭkrainiec pierajechaŭ u Biełaruś nibyta da kachanaj žančyny, ź jakoj paznajomiŭsia praź internet. Praŭda, virtualnyja adnosiny ŭ niešta bolš surjoznaje nie pieraraśli. U rodnaj vioscy ŭciekača zastałasia 16-hadovaja dačka ad pieršaha šlubu i pažyłyja baćki.
U artykule havorycca pra toje, što hieroj publikacyi da poŭnamaštabnaj vajny jeździŭ pracavać u Rasiju. A paśla atrymańnia pozvy ŭ vojska jaho nakiravali na zbory, dzie «vučyli kapać akopy». Paźniej, kali vieryć prapahandystam, Ryhor niekalki dzion pravioŭ u vakolicach Bachmuta, dzie, pavodle jahonych słovaŭ, ukrainskija vajskovyja padraździaleńni nieśli vialikija straty. Atrymaŭšy zvalnieńnie na asnovie statusu baćki-adzinočki, Ryhor źjechaŭ za miažu, a paśla praz Polšču pierajechaŭ u Biełaruś.
«My havorym na adnoj movie. U vas cicha i spakojna, možna zarabić hrošy […] Razumieŭ, što mohuć być prablemy, pakolki parušaju zakon svajoj krainy», — pryvodzić słovy ŭkrainca «Homielskaja praŭda».
U kancy artykuła prapahandysty źmiaścili zvarot uciekača da prezidenta Ukrainy Uładzimira Zialenskaha, jaki pavinien «zaviaršyć bajavyja dziejańni».
Hetaja publikacyja vidavočna maje na mecie danieści da biełaruskich čytačoŭ pasyły pra «słabuju bajazdolnaść ukrainskaha vojska i paraženčyja nastroi siarod vajskoŭcaŭ», a taksama pra Biełaruś jak vostraŭ stabilnaści i miru.
Čytajcie taksama:
