Vasilevič, Davydźka, Savinych — chto z deputataŭ Pałaty nie idzie na pieravybary
«Naša Niva» skłała śpis paznavalnych deputataŭ, jakija nie prajšli filtracyju, a značycca, nie trapiać u parłamient nastupnaha sklikańnia. Niekatoryja iduć na piensiju, a niekatorym daviadziecca šukać zaniatak.
Maryja Vasilevič
26 hadoŭ. Siabra kamisii pa pravach čałavieka, nacyjanalnych dačynieńniach i srodkach masavaj infarmacyi. Najmałodšaja siarod deputataŭ Pałaty pradstaŭnikoŭ.
«Mis Biełaruś-2018» i vypusknica Biełaruskaha dziaržaŭnaha ekanamičnaha ŭniviersiteta, Maryja časta była spadarožnicaj Łukašenki na ŭračystych imprezach.
Maryja Vasilevič. Fota: sacyjalnyja sietki
Jak stała deputatkaj, Vasilevič zajaŭlała, što płanuje ŭsurjoz zaniacca adpracoŭkaj zakonaprajekta «Ab abychodžańni z žyviołami».
U 2020 hodzie Vasilevič naviedała ŭ staličnaj balnicy chutkaj dapamohi ludziej, jakija paciarpieli padčas vuličnych akcyj pratestu, i vybačyłasia.
Nieŭzabavie paśla hetaha jana trapiła ŭ niałasku i faktyčna źnikła z publičnaj palityki.
Lilija Ananič
64 hady. Namieśnica kiraŭnika kamisii pa pravach čałavieka, nacyjanalnych dačynieńniach i srodkach masavaj infarmacyi.
Lilija Ananič. Fota: belta.by
Siarod deputackich «dasiahnieńniaŭ» Ananič — raspracoŭka prajekta abnoŭlenaha zakonu ab hramadzianstvie.
Jon praduhledžvaje normu ab pazbaŭleńni hramadzianstva tych, chto znachodzicca za miežami Biełarusi i ŭ dačynieńni da kaho vyniesieny prysud ab «učynienym złačynstvie ekstremisckaj nakiravanaści». Takija vyraki vynosiacca palityčnym apanientam Łukašenki.
Ananič u 2014-2017 uznačalvała Ministerstva infarmacyi.
Uładzimir Andrejčanka
75 hadoŭ. Staršynia Pałaty pradstaŭnikoŭ i adzin z najbližejšych paplečnikaŭ Łukašenki. Staršyniavaŭ u Pałacie z 2008 hoda.
Uładzimir Andrejčanka. Fota: belta.by
Andrejčanka znachodzicca ŭ sankcyjnym śpisie Kanady za raźmiaščeńnie i transparciroŭku rasijskich vojsk, jakija ŭziali ŭdzieł u poŭnamaštabnaj ahresii Rasii suprać Ukrainy 24 lutaha 2022 hoda.
Aleh Biełakonieŭ
58 hadoŭ. Staršynia kamisii pa nacyjanalnaj biaśpiecy.
Hienierał-major, były načalnik Hienieralnaha štaba. U 2019-m pajšoŭ u adstaŭku, bo staŭ deputatam Pałaty pradstaŭnikoŭ.
Aleh Biełakonieŭ. Fota: belokonev.house.gov.by
U 2021 hodzie prapanavaŭ kanfiskoŭvać majomaść i pazbaŭlać hramadzianstva za zakliki da sankcyj.
Valeryj Varaniecki
60 hadoŭ. Siabra pastajannaj kamisii pa mižnarodnych spravach.
U minułym dypłamat. Byŭ pasłom u Słavakii, Aŭstryi i Charvatyi, pastajannym pradstaŭnikom Biełarusi ŭ mižnarodnych arhanizacyjach u Vienie i ŭ ABSIE. U deputatach z 2016 hoda.
Valeryj Varaniecki. Fota: belta.by
Varaniecki byŭ siarod paručycielaŭ za vyzvaleńnie žurnalistak Tut.by z-pad varty. Nie padtrymlivaŭ znosu kryžoŭ u Kurapatach, vystupaŭ za stvareńnie ŭniviersiteta ź biełaruskaj movaj vykładańnia.
U 2020-ym sustrakaŭsia ź ludźmi sa svajoj akruhi i kazaŭ, što salidarny z pratestoŭcami, jakija aburylisia arhanizacyjaj sioletnich prezidenckich vybaraŭ. Vykazvaŭsia suprać zabarony bieła-čyrvona-biełaha ściaha.
Hienadź Davydźka
68 hadoŭ. Staršynia kamisii pa pravach čałavieka, nacyjanalnych dačynieńniach i srodkach masavaj infarmacyi.
Eks-kiraŭnik BT i były staršynia hramadskaj arhanizacyi «Biełaja Ruś». Zajaŭlaŭ, što «Biełaja Ruś» budzie nie zmahacca za ŭładu, a dapamahać palityčnym partyjam i tym lidaram, mierkavańnie i pazicyju jakich padzialaje.
Hienadź Davydźka
Vynošvaŭ ideju stvaryć praŭładnuju partyju «Za Radzimu».
Zajaŭlaŭ, što adurmanienyja chłopcy bieł-čyrvona-biełaj brytvaj pierarazajuć horła svajoj radzimie. Nie bačyŭ sensu ŭ praviadzieńni dyjałohu miž pratestoŭcami i ŭładaju.
A niekali zaklikaŭ lehalizavać prastytucyju ŭ Biełarusi.
Tenhiz Dumbadze
59 hadoŭ. Namieśnik staršyni pastajannaj kamisii pa mižnarodnych spravach.
Były televiadučy ANT. Ličyć siabie biełaruskim hruzinam.
Tenhiz Dumbadze
Kazaŭ, što byŭ u 2014 hodzie na Majdanie, kali tam stralali ŭ ludziej.
Padčas pandemii adziny z deputataŭ, chto byŭ na pasiadžeńniach u mascy.
Śviatłana Lubieckaja
52 hady. Staršynia pastajannaj kamisii pa zakanadaŭstvie. Maje hanarovaje zvańnie «zasłužany juryst Biełarusi».
Jeŭrasajuz nakłaŭ na jaje sankcyi ŭ suviazi z tym, što ŭznačalenaja joju kamisija raspracoŭvała i pryniała represiŭnaje zakanadaŭstva ŭ dačynieńni da ŭdzielnikaŭ mirnych pratestaŭ. Lubieckaja asprečvała sankcyi, ale pazoŭ byŭ adchileny Jeŭrapiejskim sudom u Luksiemburhu.
Ihar Marzaluk
55-hadoŭ. Staršynia kamisii pa adukacyi, kultury i navucy.
Praŭładny historyk i addany łukašenkaviec.
Ihar Marzaluk
Marzaluk vydumlaje, što pad bieł-čyrvona-biełym ściaham čynilisia vajennyja złačynstvy suprać mirnaha nasielnictva padčas niamieckaj akupacyi. Namahajecca histaryčna abhruntavać panavańnie režymu Łukašenki. Praciŭnikaŭ vinavacić u tym, što jany chočuć razburyć biełaruskuju dziaržaŭnaść.
Marzaluk sprabuje pieraabracca, ale nie vyhladaje praŭładnym kandydatam na pryznačeńnie.
Andrej Savinych
61 hod. Staršynia kamisii pa mižnarodnych spravach.
Były dypłamat i pres-sakratar ministerstva zamiežnych spraŭ.
Andrej Savinych
34-hadovaja dačka Savinych Lizavieta žyvie i pracuje ŭ Vialikabrytanii, jakuju režym Łukašenki pryznaje za «niedružalubnuju».
Sam Savinych zajaŭlaŭ, što na Zachadzie niama demakratyi, a ŭ Biełarusi jana prysutničaje. Vystupaŭ za pryniaćcie zakona ab «zamiežnych ahientach» — jak u Rasii.
«Naša Niva» — bastyjon biełaruščyny
PADTRYMAĆHladzicie taksama:
Kaho pastaviać śpikieram Pałaty pradstaŭnikoŭ zamiest śpisanaha Andrejčanki?
Na deputackija vybary pojdzie «Jaśka-haspadar». Virtualnaha kandydata paabiacaŭ Labiedźka
