Za čatyry malunki. Baranavickaha aktyvista biez nahi asudzili na čatyry z pałovaj hady kałonii
U sudzie Baranavickaha rajona i horada Baranavičy 30 maja ahučyli prysud byłomu bajkieru i aktyvistu Iharu Šumiłavu — čatyry z pałovaj hady źniavoleńnia va ŭmovach ahulnaha režymu. Palitviaźnia pryznali vinavatym pavodle troch artykułaŭ Kryminalnaha kodeksa za čatyry malunki ŭ «Adnakłaśnikach». Sudździa Mikałaj Kmita razhladzieŭ spravu za adnu hadzinu, piša «Viasna».
Ihar maje invalidnaść treciaj hrupy — 10 hadoŭ tamu jon trapiŭ u DTZ i straciŭ nahu, a taksama praz heta maje surjoznuju prablemu z pravaj rukoj. U mužčyny jość 11-hadovy syn. Zatrymali Šumiłava 23 lutaha ŭ Baranavičach. Na nastupny dzień jaho asudzili pavodle art. 19.11 KaAP za «raspaŭsiud ekstremisckich materyjałaŭ». Sudździa Viktoryja Pakunova pryznała jaho vinavatym i aryštavała na 15 sutak.
Paźniej suprać jaho ŭzbudzili kryminalnuju spravu pavodle art. 369 (abraza pradstaŭnika ŭłady), art. 368 (abraza Łukašenki) i art. 367 (paklop na Łukašenku) Kryminalnaha kodeksa.
Sud nad mužčynam adbyŭsia 30 maja ŭ sudzie Baranavickaha rajona i horada Baranavičy. Spravu razhladaŭ sudździa Mikałaj Kmita, dziaržabvinavačańnie padtrymlivała prakurorka Śviatłana Pasiemka.
Padstavaj dla kryminalnaj spravy stali čatyry pasty ŭ «Adnakłaśnikach» z satyryčnymi malunkami z Łukašenkam, a taksama z Viktaram Łukašenkam, kiraŭnikom Hrodzienskaj vobłaści Uładzimiram Karanikam, pamočnikam Łukašenki pa Hrodzienskaj vobłaści Juryjem Karajevym, hienprakuroram Andrejem Šviedam, ministram unutranych spraŭ Ivanam Kubrakovym, eks-načalnikam HUBAZiKa Mikałajem Karpiankovym, historykam Iharam Marzalukom, načalnikam kryminalnaj milicyi Hienadziem Kazakievičam.
Prakurorka Śviatłana Pasiemka. Skrynšot prapahandysckaha videa
Na TRK «Brest» 31 maja vyjšaŭ videasiužet pra sud nad Šumiłavym, u jakim prakurorka raspaviała pra abvinavačańnie. Pavodle śledstva, u rozny pieryjad času z 1 maja 2020 hoda pa 23 maja 2022 hoda Šumiłaŭ apublikavaŭ čatyry pasty ŭ «Adnakłaśnikach» z satyryčnymi malunkami, u jakich śledstva ŭhledzieła abrazu Łukašenki i pradstaŭnikoŭ ułady, a taksama paklop na Łukašenku. Viadoma, što na adnoj z vyjaŭ Łukašenka razam ź pieraličanymi asobami namalavany ŭ vyhladzie aryštantaŭ, jakija ŭtrymlivajucca ŭ turemnaj kamiery.
Na sudzie Ihar całkam pryznaŭ svaju vinu. Jon patłumačyŭ, što publikacyi na jahonaj staroncy źjavilisia tolki paśla taho, jak jon pastaviŭ «łajk» pad hetami pastami. Sam jon nie razumieŭ na toj momant, što hetyja malunki mohuć być rascenieny jak abraza.
U vyniku sudździa Kmita pryznačyŭ Iharu čatyry z pałovaj hady źniavoleńnia va ŭmovach ahulnaha režymu — mienavita stolki zaprasiła prakurorka.
Padtrymajcie palitviaźnia hrašovymi pieravodami, pasyłkami, telehramami i listami:
SIZA-6, 225413, Baranavičy, Bresckaja, 258 V,
Ihar Jurjevič Šumiłaŭ.
