«Hetaja situacyja moža pahražać mnie poŭnym p***com». Doktarka škłoŭskaj kałonii, dzie pamior Ašurak, u panicy chacieła zvolnicca
«Aljans rasśledavalnikaŭ Biełarusi» apublikavaŭ aŭdyjazapis, u jakim adna z doktarak, što pracavała ŭ škłoŭskaj kałonii ŭ čas śmierci Vitolda Ašurka, paśla zdareńnia molić svajho znajomaha pieravieści jaje na novaje miesca słužby. Ale byłyja palitviaźni paviedamili «Našaj Nivie», što žančyna moža ŭsio jašče pracavać u PK-17.
Dabradzieraviec Natalla Ivanaŭna, načalnica miedycynskaj čaści papraŭčaj ustanovy PK-17 u Škłovie. Kałaž: «Naša Niva»
U publikacyi «Aljansu rasśledavalnikaŭ Biełarusi» ad 21 maja fihuruje infarmacyja, što načalnica miedycynskaj čaści PK-17 Natalla Dabradzieraviec praz amal 40 dzion paśla zabojstva Vitolda Ašurka telefanuje pałkoŭniku milicyi Alaksandru Kazłovu, hałoŭnamu sanitarnamu doktaru Departamienta finansaŭ i tyłu MUS, z prośbaj terminova pieravieści jaje sa Škłova na inšaje miesca słužby.
Zhodna sa źlitym u sieciva zapisam telefonnaha zvanka pamiž Dabradzieraviec i Kazłovym, takaja śpiešnaść tłumačycca «zdareńniem sa śmierciu palitviaźnia, što źjaŭlajecca prostaj niedarečnaściu, ale moža abiarnucca poŭnym p***com».
«U mianie tut na pracy niešta niezrazumiełaje. Tut niejak usio nie składvajecca, usio zdaryłasia źnianacku. Situacyja stanovicca nastolki składanaj, što nam ź Siarhiejem, chutčej za ŭsio, daviadziecca syści».
Havorka, napeŭna, idzie pra Siarhieja Karčeŭskaha — supracoŭnika PK-17, jakoha nazyvajuć saŭdzielnikam ździekaŭ z palitviaźniaŭ, u tym liku i ź Vitolda Ašurka.
«Pa sutnaści, adbyłasia sapraŭdnaja niedarečnaść, adnak hetaja situacyja moža pahražać mnie poŭnym p***com, kali ja zastanusia, — praciahvaje jana. — Dyj nie fakt, što mianie adpuściać, Škłoŭ — taki abjekt, što chren adpuściać. U nas jakraz idzie pravierka pa hetym palitviaźni, i ja vielmi spadziajusia, što ŭsio ŭ vyniku atrymajecca zahładzić», — kaža Natalla Dabradzieraviec svajmu znajomamu pałkoŭniku milicyi Alaksandru Kazłovu.
Siarhiej Karčeŭski — načalnik režymnaj čaści PK-17 u Škłovie. Na fota jon, Natalla Dabradzieraviec i inšyja supracoŭniki kałonii stajać pobač ź Vitoldam Ašurkam, jaki, źniasileny, lažyć na padłozie. Skrynšot ź videa «Aljansu rasśledavalnikaŭ Biełarusi»
Pry hetym, pavodle poŭnaha zapisu, načalnicu miedčaści škłoŭskaj kałonii vielmi spužała nie vina za śmierć nievinavataha čałavieka, a toje, što jana razam ź Siarhiejem Karčeŭskim «padstaviła» načalnika PK-17, jaki ŭ adpłatu za heta moža «značna pahoršyć ich umovy isnavańnia».
U vyniku, jak śćviardžaje «Aljans rasśledavalnikaŭ Biełarusi», Natalla Dabradzieraviec nieŭzabavie zmahła zvolnicca, ale hetuju infarmacyju nie paćviardžajuć byłyja palitviaźni, jakija adbyvali svoj termin u kałonii Škłova.
Niekalki ź ich źviazalisia z «Našaj Nivaj» i paviedamili, što jak minimum na pačatak 2023 hoda načalnica miedčaści jašče pracavała ŭ PK-17.
Taksama jany raskazali, što zvyčajna Natalla Dabradzieraviec pierasoŭvajecca pa kałonii tolki ŭ supravadžeńni Siarhieja Karčeŭskaha, a cama jana «stała vielmi pałachlivaj u prysutnaści asudžanych».
«Hetaja načmied biare niepasredny ŭdzieł u kamisii pa pakarańni asudžanych, jakaja rehularna biespadstaŭna adpraŭlaje palityčnych u ŠIZA», — dzielacca byłyja palitviaźni.
Nahadajem, što raniej byłyja palitviaźni taksama dzialilisia padrabiaznaściami pra Vitolda Ašurka i mahčymyja abstaviny jaho hibieli ci zabojstva.
Infarmacyja ad byłych palitviaźniaŭ pra Vitolda Ašurka:
Były viazień škłoŭskaj kałonii raskazaŭ, chto moža być datyčny da hibieli Vitolda Ašurka
«Z kamiery, dzie siadzieŭ Vitold, byli čuvać kryki». Były palitviazień raskazaŭ padrabiaznaści pra hibiel Ašurka
«Metaj było nie zabić, a złamać maralna». Jašče adzin były viazień škłoŭskaj kałonii raskazaŭ svaju viersiju śmierci Vitolda Ašurka
Niadaŭna ŭ adnoj ź biełaruskich kałonij zahinuŭ jašče adzin palitviazień Mikałaj Klimovič, u jakoha byli surjoznyja prablemy z sercam. Abstaviny jaho hibieli da hetaha času zastajucca nieviadomymi.
Palitviaźniaŭ utrymlivajuć va ŭmovach, roŭnych katavańniu. Na Akreścina ich utrymlivajuć pa 25 čałaviek u kamierach, raźličanych na šaściarych. U kałonijach ich biespadstaŭna źmiaščajuć u ŠIZA, źbivajuć, pazbaŭlajuć pieradač, źniščajuć vychodnuju i ŭvachodnuju karespandencyju, pryznajuć schilnymi da ekstremizmu. Majuć miesca ździeki pa nacyjanalnaj prykmiecie — biełaruskamoŭnych viaźniaŭ prymušajuć razmaŭlać i pierapisvacca pa-rusku. Suviazi ź niekatorymi viaźniami niama miesiacami.
Masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja bazavyja normy zakonnaści i marali.
«Naša Niva» — bastyjon biełaruščyny
PADTRYMAĆČytajcie taksama:
«Mianie pasadzili, bo ja kazaŭ praŭdu». Što Vitold Ašurak napisaŭ u apošnim liście da mamy
Kolki palitviaźniaŭ pamierła ci źviało rachunki z žyćciom praź nievynosnyja ŭmovy za kratami