«I tut ja vyjšaŭ ź siabie». Na błasłavieńnie Papy Franciška prynieśli sabaku
Papa Rymski Francišak zaklikaŭ italjancaŭ naradžać bolš dziaciej i nie zamianiać ich svojskimi žyviołami. Nizkaja naradžalnaść stała adnoj z najbolš surjoznych prablem Italii, i ŭłady aścierahajucca, što jana moža pryvieści da rezkaha padzieńnia ekanomiki.
Papa Francišak. Fota: AP
U piatnicu pantyfik uziaŭ udzieł u kanfierencyi, pryśviečanaj demahrafičnamu kryzisu ŭ Italii, i raspavioŭ pra toje, jak adna ź viernic adčyniła sumku i paprasiła jaho «błasłavić jaje małoha». Adnak u sumcy było nie dzicia, a nievialiki sabaka, piša Bi-bi-si.
«Tut ja vyjšaŭ ź siabie i zrabiŭ joj vymovu. Skazaŭ, što ciapier mnostva dziaciej haładaje. Navošta ž vy mnie prynosicie sabaku?» — zajaviŭ Francišak, sarvaŭšy pry hetym apładysmienty aŭdytoryi.
U Italii — adzin z samych nizkich pakazčykaŭ naradžalnaści ŭ Jeŭropie. Letaś u krainie naradziłasia mienš za 400 tys. dziaciej, što składaje histaryčny minimum. Pry hetym ahulnaje nasielnictva Italii da pačatku 2022 hoda skaraciłasia na 250 tysiač čałaviek (svaju rolu pry hetym adyhrała nie tolki padzieńnie naradžalnaści, ale i pandemija karanavirusa).
Pa słovach Papy, u Italii dla stvareńnia novaj siamji patrebnyja «tytaničnyja namahańni», i dazvolić sabie heta mohuć tolki bahatyja ludzi.
U svaim vystupie pantyfik skazaŭ, što padzieńnie naradžalnaści kaža pra toje, što maładyja ludzi hublajuć vieru ŭ budučyniu i pakutujuć ad niavyznačanaści. «Sapraŭdnymi prablemami stali pošuk stabilnaj pracy, vielmi vysoki košt arendy žylla i niedastatkovyja zarobki», — zajaviŭ Francišak.
Čamu padaje naradžalnaść
Ekśpierty zhadžajucca, što adnoj z pryčyn padzieńnia naradžalnaści ŭ Italii zastajucca ciažkaści z pošukam pracy dla moładzi.
Akramia taho, žychary krainy časta skardziacca na miascovuju sistemu dohladu dziaciej: pa danych dabračynnaj arhanizacyi Save The Children, šeść ź dziesiaci italjanskich maci nie mohuć adpravić svaich dziaciej u dziciačyja sady.
Mnohich ciažarnych žančyn u Italii vymušajuć sychodzić z pracy, a niekatorych zvalniajuć paśla taho, jak jany pačynajuć čakać dzicia.
Naradžalnaść padaje ŭ mnohich krainach śvietu, uklučajučy Japoniju, Paŭdniovuju Kareju, Partuhaliju i Puerta-Ryka. Adnak dla Italii pahroza skaračeńnia nasielnictva asabliva surjoznaja.
Heta treciaja pa pamiery ekanomiki kraina jeŭrazony, i da 2050 hoda kolkaść jaje žycharoŭ moža źmienšycca na 25% (pa danych na kaniec 2022 hoda nasielnictva Italii składała kala 59 młn čałaviek). Pry hetym žychary krainy chutka starejuć. Za apošnija 20 hadoŭ kolkaść italjancaŭ, uzrost jakich pieravysiŭ 100 hadoŭ, vyrasła ŭtraja.
Italiju časta nazyvajuć «krainaj pustych kałysak», u krasaviku ŭładalnik kampanij Twitter, Tesla i SpaceX Iłan Mask napisaŭ u svaim tvitary: «Italija źnikaje!»
Ekśpierty i ŭłady papiaredžvajuć, što padzieńnie kolkaści nasielnictva moža pryvieści da biednaści.
Ministr ekanomiki Italii Džankarła Džyarhieci zajaviŭ, što da 2042 hoda skaračeńnie naradžalnaści ŭ krainie pryviadzie da źnižeńnia VUP na 18%.
Čytajcie taksama:
Papa Francišak: Finansavyja skandały škodziać dobramu imieni Kaścioła
«Usio jašče žyvy». Papu Franciška vypisali sa špitala
Papa Francišak zasnavaŭ dla biełaruskich hreka-katolikaŭ Apostalskuju administraturu
