Minabarony apublikavała malaŭničy rolik pra toje, jak kiroŭca kinuŭ pietardu ŭ bok vajskoŭcaŭ
Telekanał Ministerstva abarony «VajenTB» apublikavaŭ rolik pra incydent, jaki nibyta adbyŭsia na trasie M5 uviečary 11 maja. Jon dapaŭniaje infarmacyju, jakuju pierad tym daŭ Śledčy kamitet, malaŭničymi padrabiaznaściami, ale nie vyhladaje dakumientalnym.
«Naša padraździaleńnie ruchałasia pa darozie. Zrabili pryvał. U toj čas pa kirunku ruchu jechaŭ aŭtamabil, z kabiny jakoha kiroŭca hetaha aŭtamabila vykinuŭ vybuchovaje prystasavańnie. Vybuchovaja pryłada zdetanavała», — raskazaŭ vajskoviec u bałakłavie i achoŭnych akularach, jakoha niemahčyma paznać.
Dalej na videa demanstrujecca, jak vajskoŭcy pačynajuć pahoniu i zatrymlivajuć kiroŭcu. Pry hetym karcinka nie padobnaja na materyjały apieratyŭnaj zdymki, a padobnaja na toje, što ŭžo pastfaktum śpiecyjalna zdymałasia kino.
Metaj ža jaho zdymańnia i demanstracyi, jak vyhladaje, źjaŭlajecca nie infarmavańnie, a zastrašvańnie.
Bo ŭ siužecie toj ža vajskoviec pramym tekstam havoryć, što zbroju nie vykarystali tolki tamu, što nichto nie paciarpieŭ, «a kali było b inakš, kiroŭcu b u pałon nie brali». A zakančvajecca rolik słovami, što śledstva, maŭlaŭ, viadziecca, ale ŭžo i zaraz možna skazać, što «imhniennaja reakcyja vajskoŭcaŭ stała surjoznaj prafiłaktyčnaj mieraj dla haračych hałoŭ».
Prytym admysłova padkreślivałasia, što «adrazu paśla zatrymańnia było vidać, što kiroŭca prytrymlivajecca destruktyŭnych pohladaŭ», u paćviardžeńnie čaho prademanstravali nalepki ź biełaruskaj simvolikaj i z łahatypam niamieckaha hurta «Ramštajn», jakija raniej užo fihuravali ŭ kudy bolš łakaničnym i mienš malaŭničym roliku Śledčaha kamiteta.
Pakazali i kiroŭcu, jakomu, jak paviedamili, 51 hod. Jon, maŭlaŭ, daje pakazańni, a ŭ videasiužecie nazvaŭ svoj učynak idyjockim. Heta byli adzinyja jahonyja słovy, jakija puścili ŭ efir.
Čytajcie taksama:
Kiroŭca fury sprabavaŭ napaści na vajskoŭcaŭ la miažy — Minabarony
