Padraździaleńnie ŭkrainskaj terytaryjalnaj abarony, u jakim na miažy ź Biełaruśsiu zahinuŭ bajec, pieraviali na ŭschodni front
U vydańnie «Ukrainskaja praŭda» źviarnulisia svajaki zahinułaha pablizu ŭkrainska-biełaruskaj miažy vajskoŭca teraborony Vałyni Siarhieja Panasiuka i paviedamili, što padraździaleńnie, u jakim toj słužyŭ, raptam pieraviali pad Bachmut. Svajaki vajskoŭcaŭ zasumniavalisia, ci nie źviazana z tym, što praŭdu pra abstaviny śmierci sałdata chočuć schavać. Ale kamandavańnie zapeŭniła, što nie.
Fota: staronka ŭ fejsbuku Hienštaba USU. Zdymak ilustracyjny
Pa słovach svajakoŭ vajskoŭcaŭ, 1 sakavika, praź niekalki dzion paśla hibieli Panasiuka (jon zahinuŭ 25 lutaha), jaho pabracimaŭ terminova pačali pierakidvać na Bachmucki kirunak. Ź ich słoŭ, bajcoŭ «pieravozili z surjoznym supravadžeńniem, mnohim nie dali navat raźvitacca z rodnymi». Taksama svajaki kažuć, što sałdat adpravili biez naležnaj ekipiroŭki, tamu im daviałosia terminova paadkryvać zbory na ciepłavizary, amunicyju i h. d.
Akramia taho, pa słovach rodnych, niekatorym bajcam skazali, što ich viazuć na palihon u Žytomirskaj vobłaści, a inšym — što ŭ Zaparožskaj. Ale ŭsie jany ŭrešcie trapili na Bachmucki kirunak.
«Ukrainskaja praŭda» z hetaj nahody źviarnułasia z zapytami ŭ Hienštab USU i Abjadnanyja siły USU. Tam paviedamili, što vajskovaja čaść A7062, u jakoj słužyŭ Siarhiej Panasiuk, sapraŭdy pieradysłakavali na ŭschod, ale heta zrabili płanava.
Pry hetym u Paŭnočnym abjadnanym pres-centry USU padkreślili, što na pryniaćcie rašeńnia ab pryciahnieńni vajskovaj častki A7062 da vykanańnia bajavych zadač na ŭschodzie Ukrainy incydent z hibiellu bajca niepadalok ad miažy ź Biełaruśsiu nijak nie paŭpłyvaŭ, a rašeńnie ab pieramiaščeńni asabovaha składu vajskovaj čaści A7062 prymałasia z pryčyny «vysokaha ŭzroŭniu matyvavanaści, navučanaści i zabiaśpiečanaści padraździaleńnia». Pry hetym «nivodzin vajskoviec skarhaŭ na stan zdaroŭja nie vykazvaŭ i pa miedycynskuju dapamohu da lekaraŭ miedycynskaha punkta vajskovaj častki nie źviartaŭsia».