Brest i vakolicy mocna padtapiła hruntavymi vodami, padniałasia vada i ŭ rekach
Niekatoryja terytoryi Bresta i jaho vakolic pieratvarylisia ŭ svojeasablivuju «Vieniecyju». U siecivie źjaviłasia šmat fota i videa zatoplenych učastkaŭ. Situacyju prakamientavaŭ u telehramie staršynia Bresckaha harvykankama Alaksandr Rahačuk.
Vinoj usiamu stała plusavaja tempieratura i bahatyja apadki. U vyniku ŭ rekach Buh i Muchaviec padniałasia vada. U Buhu jaje ŭzrovień składaje 446 sm (u pojmie — 380 sm), a ŭ Muchaŭcy — 278 sm (u pojmie — 240 sm). Adpaviedna, padnialisia i hruntavyja vody. Voś učastki i asobnyja terytoryi horada i padtapiła.
Pa słovach Alaksandra Rahačuka, apošni raz takaja situacyja adznačałasia kala 10 hadoŭ tamu.
Tolki na hetym tydni ŭ MNS pastupiła zvyš 20 paviedamleńniaŭ ab padtapleńniach dvarovych terytoryj Bresta, sadovych učastkaŭ, damoŭ i pabudoŭ.
U adnym vypadku ratavalniki dapamahli adpampavać vadu — tam, dzie była pahroza zatapleńnia aciaplalnaha i elektraabstalavańnia. U astatnich — zajaŭki pieradavalisia ŽKH.
Kamunalnyja słužby ŭ 8 vypadkach taksama adpampoŭvali vadu tam, dzie mielisia abmiežavańni žycharoŭ u dostupie ŭ žyłyja damy.
Muchaviec, jaki vyjšaŭ ź bierahoŭ, zatapiŭ navat łavački na nabiarežnaj.
Staršynia harvykankama zaŭvažaje, što najbolš krytyčnaja situacyja — u mikrarajonie Hieršony i na terytoryi sadavodčaha tavarystva «Rubiež», jakoje raźmieščanaje ŭ niepasrednaj blizkaści ad Buha. Tam zatapiła zvyš sto sadovych učastkaŭ.
Čytajcie taksama:
Pavodka padtapiła niekatoryja ŭčastki i darohi na poŭdni Biełarusi
