WSJ: Słužba biaśpieki Ukrainy zabiła čałavieka, bieź jakoha «Kijeŭ by ŭziali»
Kiraŭnik vajskovaj raźviedki Ukrainy Kiryła Budanaŭ zajaviŭ vydańniu Wall Street Journal, što bieź infarmacyi ad finansista Dzianisa Kirejeva «Kijeŭ byŭ by ŭziaty». Ale Kirejeva zatrymała SBU, a potym jaho cieła znajšli na tratuary z kulaj u patylicy.
Mahiła Dzianisa Kirejeva na prestyžnych Bajkavych mohiłkach u Kijevie. Fota JOSEPH SYWENKYJ / THE WALL STREET JOURNAL
Dzianis Kirejeŭ pracavaŭ u strukturach jeŭrapiejskich i amierykanskich bankaŭ, a taksama va ŭkrainskim «Aščadbanku». U nulavych jon pačaŭ pracavać ź biznesmienami, jakich ličyli blizkimi da eks-prezidenta Ukrainy Viktara Janukoviča. Kalehi Kirejeva skazali WSJ, što paźniej Kirejeŭ dapamahaŭ im vyvieści aktyvy z Ukrainy.
Adzin sa svajakoŭ bankira jašče ŭ 2003 hodzie staŭ namieśnikam kiraŭnika Słužby biaśpieki Ukrainy. A siabar Kirejeva skazaŭ WSJ, što bankiru «padabałasia ihrać rolu ahienta 007». U 2021 hodzie dziejnaść Kirejeva pryciahnuła ŭvahu hienierała Kiryły Budanava, niezadoŭha da taho pryznačanaha kiraŭnikom vajskovaj raźviedki.
Uvosień 2021 hoda, kali amierykanskija vajskoŭcy i špijonskija ŭstanovy pačali papiaredžvać ab rasiejskaj pahrozie, Kirejeŭ daviedaŭsia sa svaich krynic, što Maskva rychtujecca da ŭvarvańnia, skazaŭ Budanaŭ, i staŭ pieršym, chto zabiŭ tryvohu va Ukrainie.
Dniom 23 lutaha Kirejeŭ pieradaŭ Budanavu novyja raźviedvalnyja źviestki: prezident Rasii Uładzimir Pucin tolki što addaŭ zahad ab uvarvańni ranicaj. Pa słovach kiraŭnika HUR, Kirejeŭ taksama viedaŭ hałoŭnuju kropku ŭdaru.
U 8 hadzin ranicy 24 lutaha rasiejskija bajavyja viertaloty vysadzili desant u aeraporcie «Antonaŭ» pad Kijevam. Kreml płanavaŭ zachapić aeraport, kab pierakinuć tudy vojski i techniku dla šturmu stalicy.
Sa słoŭ Budanava, padkazka Kirejeva dała Ukrainie niekalki kaštoŭnych hadzin, kab pierakinuć vojski dla procidziejańnia rasiejskamu napadu. Paśla žorstkaha boju z rasiejcami aeraport byŭ paškodžany i nie moh vykarystoŭvacca siłami akupantaŭ.
Kali płany Rasiei pa chutkim udary byli sarvanyja, baki damovilisia ab pieramovach ab spynieńni ahniu ŭ Biełarusi. Pakolki Kirejeŭ byŭ znajomy z dvuma členami rasijskaj delehacyi, Budanaŭ prapanavaŭ jamu pryniać udzieł u pieramovach — i toj pahadziŭsia.
«Paśla jaho źjaŭleńnia tam jaho suviaź sa śpiecsłužbami stała vidavočnaj dla ŭsich. Na žal, situacyja tady była krytyčnaj, i my vymušanyja byli ryzykavać», — skazaŭ Budanaŭ.
Viarnuŭšysia ź Biełarusi, Kirejeŭ sustreŭsia z Budanavym na niekalki hadzin. Kirejeŭ, pa słovach siabra jaho słužby biaśpieki, uśviedamlaŭ, što jamu pahražaje niebiaśpieka, i pakinuŭ sustreču ŭ maŭklivym nastroi.
Praź niekalki dzion siabra naviedaŭ Kirejeva ŭ jaho domie na paŭnočnaj ŭskrainie Kijeva. Trymajučy ŭ rukach bujnakalibiernuju palaŭničuju strelbu, Kirejeŭ skazaŭ, što stralaŭ ź jaje ŭ ruskich apieratyŭnikaŭ, jakija pryjšli da jaho doma niekalkimi načami raniej.
Kali Rasija i Ukraina damovilisia ab druhim raŭndzie pieramovaŭ, zapłanavanym na 3 sakavika, Budanaŭ znoŭ nastajaŭ na tym, kab Kirejeŭ pryniaŭ u ich udzieł.
Ale pierad druhim raŭndam pieramovaŭ Dzianisu Kirejevu patelefanavali z pryjomnaj dyrektara kontrraźviedki SBU Alaksandra Pokłada, skazaŭ WSJ Budanaŭ. Paśla hetaha bankir pryjechaŭ u Kijeŭ i papiaredziŭ svaich ciełaachoŭnikaŭ i supracoŭnikaŭ vajskovaj raźviedki, jakija byli ŭ jaho hrupie, što jaho mohuć aryštavać. Jany padjechali da Safijskaha sabora, tam ź mikraaŭtobusaŭ da ich vybiehli ahienty SBU i zahadali zdać zbroju. Paśla hetaha Kirejeva źvieźli, a praz paŭtary hadziny jahony trup znajšli supracoŭniki vajskovaj raźviedki z kulaj u patylicy.
Spačatku zajaŭlałasia, što Kirejeva zabili padčas zatrymańnia pa padazreńni ŭ špijanažy na karyść Rasii. Ale ŭžo praź niekalki dzion paśla zabojstva iaho pachavali ź dziaržaŭnymi ŭšanavańniami, a prezident Uładzimir Zialenski paśmiarotna ŭznaharodziŭ Dzianisa Kirejeva miedalom za «abaronu dziaržaŭnaha suvierenitetu». Kiryła Budanaŭ zajaviŭ WSJ, što «kali b nie Kirejeŭ, chutčej za ŭsio, Kijeŭ byŭ by ŭziaty».
Praź niekalki miesiacaŭ Uładzimir Zialenski zvolniŭ kiraŭnika SBU, pravioŭ sieryju pierastanovak siarod jaje hienierałaŭ, było zaviedziena bolš za 650 kryminalnych spraŭ ab dziaržzdradzie.
Čytajcie taksama:
Vajennaja raźviedka Ukrainy: Zabity člen pierahavornaj hrupy Dźmitryj Kirejeŭ byŭ raźviedčykam i zahinuŭ na zadańni
