Amierykaniec vyjhraŭ u łatareju amal paŭtara miljarda dalaraŭ
Piatnica 13 studzienia stała ščaślivaj dla žychara amierykanskaha štata Men, jaki vyjhraŭ u łatareju 1,348 miljarda dalaraŭ. Jak paviedamili arhanizatary łatarei, hety hihancki vyjhryš — druhi pa vieličyni ŭ historyi.
Arhanizatary z kampanii Mega Millions paviedamili taksama, dzie byŭ nabyty ščaślivy łatarejny bilet — na aŭtazapraŭcy ŭ amierykanskim štacie Men. A voś imia ščaśliŭca ci chacia b niešta pra jaho ŭładalnika pakul nie paviedamlajecca.
Nieviadomy staŭ adzinym čałaviekam, jaki adhadaŭ usie šeść vyjhryšnych ličbaŭ, vyznačanych u piatnicu ŭviečary pa siarednieamierykanskim časie, — biełyja šary pad numarami 30, 43, 45, 46, 61 plus załaty «miehaboł» 14.
Džekpot źbiraŭsia nie adzin miesiac, razyhrać jaho ŭdałosia z 26-j sproby. Zhodna z matematyčnaj vykładkaj, šancy na pieramohu aceńvalisia jak adzin da 302,6 miljona.
Kali pieramožca łatarei vyrašyć «abnajavić» bilet i pieravieści ŭsie hrošy sabie na rachunak, to jon atrymaje «ŭsiaho» 724,6 młn dalaraŭ, — amal napałovu mienš. A pakolki ŭ ZŠA nie arhanizatar vypłačvaje padatki z vyjhryšu, a toj, chto jaho atrymlivaje, to hetaja suma pamienšycca jašče prykładna ŭdvaja.
Rekordnym u historyi vyjhryšam zastajecca džekpot 2018 hoda, — tady kuš skłaŭ 1,5 młrd dalaraŭ. Jaho ŭ toj ža Mega Millions 23 kastryčnika 2018 hoda vyjhrała žycharka Paŭdniovaj Karaliny. Pakolki jana vyrašyła nie drabić vyjhryš, atrymlivajučy jaho na praciahu troch dziesiacihodździaŭ «nievialikimi» porcyjami, a zabrać adrazu, to 1,537 miljarda pieratvarylisia ŭ «ścipłyja» 878 miljonaŭ dalaraŭ, a paśla vypłaty fiederalnych padatkaŭ i padatkaŭ štata — «usiaho» ŭ 491 miljon dalaraŭ.
Čytajcie taksama:
U ZŠA ŭ łatarei razyhrany najbujniejšy ŭ historyi džekpot
