Były ministr ekanomiki Kazachstana, jakoha sudziać za zabojstva žonki, u apošnim słovie pracytavaŭ Hitlera
Były ministr ekanomiki Kazachstana Kuandyk Bišymbajeŭ, abvinavačany ŭ zabojstvie žonki, vystupajučy z apošnim słovam u sudzie, vyrašyŭ pracytavać Hiebielsa, ale pracytavaŭ Hitlera, piša «Mieduza».
Kuandyk Bišymbajeŭ u sudzie 6 maja. Skryn videa
Bišymbajeŭ zajaviŭ, što ŭ sacsietkach i ŚMI była razhornutaja kampanija «pa raspalvańni nianaviści» da jaho i «skažeńni abstavinaŭ spravy». Jon adznačyŭ, što vyrašyŭ skarystacca pravam na sud prysiažnych «kab «danieści chacia b da 10 čałaviek praŭdu pra toj trahičny viečar i pra našy z Sałtanat stasunki».
Znoŭ paprasiŭšy prabačeńnia ŭ rodnych zabitaj žonki, eks-ministr uspomniŭ «sumna viadomaha ministra prapahandy ŭ nacysckaj Hiermanii ŭ 30-ch hadach».
«Voś jahony znakamity vyraz byŭ takim: «Čym strašniejšaj budzie naša chłuśnia, tym lahčej u jaje pavierać ludzi». Voś tak i atrymlivajecca ŭ majoj spravie. Čym žudaśniej chłuśnia, jakaja raspaŭsiudžvajecca, tym lahčej ludzi ŭ jaje pavierać. Tut navat u sudzie abaronca Urančaŭ sprabavaŭ raspalić u vas sacyjalnuju niepryjaznaść da mianie za maje minułyja dziaržaŭnyja pasady, jakija ja zajmaŭ. Ale mianie sudziać nie za heta.
Usio heta robicca z adnoj metaj — raspalić vašu nianaviść, adchilić ad abjektyŭnaści.
Ja budu adkrytym: vy maja adzinaja nadzieja na abjektyŭnaść. Spytajecie siabie: a kali b heta byŭ nie Bišymbajeŭ na łavie padsudnych, nie eks-ministr, a druhi — zvyčajny hramadzianin, było b stolki chłuśni, było b stolki ačarnieńnia ŭ sacyjalnych sietkach, abvinavačvali b hetaha čałavieka ŭ takim ciažkim złačynstvie bieź pierakanaŭčych na toje dokazaŭ?» — skazaŭ Bišymbajeŭ.
Cytata «Čym bolš žachlivaja chłuśnia, tym bolš achvotna ŭ jaje vierać» prypisvajecca Jozefu Hiebielsu, ale na samaj spravie naležyć Adolfu Hitleru i sustrakajecca ŭ jaho knizie «Mein Kampf».
Čytajcie taksama:
