Rasija vydała mužčynu pa zapycie biełaruskich uładaŭ. Jaho asudzili za abrazu siłavika
U Maskoŭskim sudzie Bresta 12 studzienia pačaŭsia razhlad kryminalnaj spravy suprać Andreja Pratasieviča pavodle art. 369 (abraza pradstaŭnika ŭłady) Kryminalnaha kodeksa. Praces vioŭ sudździa Jaŭhien Brehan. Praruror zaprasiŭ Andreju try miesiacy aryštu, piša «Viasna».
Jak paviedamlaje «Bresckaja viasna», mužčyna uradženiec h.p. Ušačy Viciebskaj vobłaści. Apošnija hady pracavaŭ i žyŭ u Maskvie. Andrej Pratasievič byŭ abjaŭleny biełaruskimi ŭładami ŭ mižnarodny vyšuk, 23 vieraśnia 2022 hoda jaho zatrymali ŭ Maskvie i źmiaścili pad vartu.
Hienprakuratura Rasii admoviła ŭ vydačy Pratasieviča praz adsutnaść u jaho dziejańniach składu złačynstva. Ale mužčynu ŭsio adno vydvaryli z Rasii praz «parušeńnie mihracyjnaha zakanadaŭstva». Andrej znachodzicca pad vartaj u Biełarusi z 7 listapada 2022 hoda.
Andreju staviać u vinu, što jon 15 sakavika 2021 hoda ŭ sacsietcy «UKantakcie» z akaŭnta Andrew Pratasevihs pakinuŭ abraźlivy kamientar u dačynieńni kamandzira Bresckaha AMAPa Maksima Michoviča.
Mužčyna svaju vinu nie pryznaŭ. Jon paviedamiŭ, što 12 sakavika, za try dni da źjaŭleńnia kamientara pra siłavika, u jaho ŭ Maskvie skrali telefon i płanšet. Andrej miarkuje, što sa skradzienaj techniki nieviadomyja mahli pakinuć abraźlivy kamientar pra Michoviča. Bo na hadžetach Andreja nie było ŭstanoŭlena anijakaj abarony dla ŭvachodu.
Dokazam taho, što telefon znachodziŭsia ŭ Andreja, sud nazvaŭ jaho listavańnie z synam. 15 sakavika 2021 hoda Andrej Pratasievič z akaŭnta Andrew Pratasevihs napisaŭ va «UKantakcie» svajmu synu, Dźmitryju Vaskrasienskamu, paviedamleńnie «Kak vnučieńka?».
Andrej patłumačyŭ, što aŭtar kamientara jon. A napisaŭ jaho, mierkavana, z pracoŭnaha kampjutara, na jakim zastavaŭsia dostup da «UKantakcie».
Pryvatnaje listavańnie Andreja z synam apynułasia ŭ siłavikoŭ z-za taho, što mužčyna na novym telefonie adnaviŭ dostup da svajho akaŭnta va «UKantakcie». Hety telefon padčas zatrymańnia Andreja zabrali siłaviki i ŭbačyli listavańnie.
Taksama prakuror spytaŭ Pratasieviča pra jaho staŭleńnie da biełaruskaj ułady. Mužčyna paviedamiŭ, što z pačatku 90-ch byŭ čalcom partyi BNF, ale paśla prezidenckich vybaraŭ pierastaŭ cikavicca palitykaj. Z taho momantu žyŭ i pracavaŭ u Rasii.
U vyniku prakuror zaprasiŭ dla Andreja 3 miesiacy aryštu. Maksim Michovič zaprasiŭ 1000 rubloŭ kampiensacyi maralnaj škody.
Termin utrymańnia pad vartaj dla Andreja było prapanavana zaličyć tolki na terytoryi Biełarusi — pieryjad z 7 listapada 2022-ha. Faktyčna Pratasieviča źmiaścili pad vartu 23 vieraśnia.
Prysud musili ahučyć 13 studzienia. Ale pakul pravaabaroncam nieviadomy vynik suda.
