Siońnia Kitaj znoŭ adkryvaje miežy dla turystaŭ paśla troch hadoŭ zakryćcia z-za COVID
Z 8 studzienia Kitaj zdymaje karancinnyja abmiežavańni i takim čynam pieravodzić karanavirus ź infiekcyjnaha zachvorvańnia kłasa A ŭ kłas B. Heta aznačaje, što ŭnutranym padarožnikam bolš nie spatrebiacca PŁR-testy, kody zdaroŭja, pravierka tempieratury. Taksama admianiajucca karancinnyja miery dla tych, chto ŭjazdžaje ŭ krainu, paviedamlaje «Interfaks».
Ułady zaklikali pažyłych ludziej z chraničnymi zachvorvańniami, ciažarnych žančyn i dziaciej źvieści pajezdki da minimumu. Taksama ŭrad prahnazuje pavyšeńnie ŭzroŭniu zachvorvańnia ŭ sielskich rajonach krainy, kudy pajedzie vialikaja častka kitajcaŭ i dzie miedycynskaja infrastruktura słabiejšaja, čym u haradach.
Čynoŭnik Ministerstva transpartu papiaredziŭ, što heta mohuć być samyja niavyznačanyja i składanyja kanikuły za apošnija hady.
Padarožnikam, jakija ŭjazdžajuć, bolš nie treba prachodzić karancin, što aznačaje značnaje źmianieńnie ŭ palitycy krainy ŭ dačynieńni da COVID, pakolki jana zmahajecca z rezkim rostam kolkaści vypadkaŭ zachvorvańnia.
Hetyja źmieny ludzi sustreli z radaściu, bo apošnija try hady mnohija nie mahli ŭźjadnacca ź siamjoj praz kavidnyja abmiežavańni.
U Hankonhu čakajecca, što ŭ nastupnyja tydni 400 000 čałaviek adpraviacca ŭ macierykovy Kitaj — u takija harady, jak Piekin i Siamyń.
Adkryćcio krainy prypadaje na pačatak «čuńjuń», pieršaha siezona padarožžaŭ u Novy hod pa miesiacovym kalendary.
Da pandemii heta była najbujniejšaja štohadovaja suśvietnaja mihracyja ludziej, jakija viartajucca dadomu, kab pravieści čas ź siamjoj.
