Zadumienny Karanik i kambajny ŭ Zimbabve. Jak miascovyja čynoŭniki zapisvali navahodnija videazvaroty
Pavinšavać nasielnictva ŭ videazvarocie imknucca nie tolki čynoŭniki vyšejšaha ranhu, ale i łakalnyja kiraŭniki. Adny pieraličvajuć hałoŭnyja dasiahnieńni rajona, inšyja — zdymajuć ramantyčnyja klipy, dzie łaščać trusika i hladziać udalačyń.
Homiel: «Našy kambajny zajšli ŭ Zimbabve»
Adnym z samych jaskravych vystupaŭ adznačyŭsia staršynia Homielskaha abłvykankama Ivan Krupko. Svoj zvarot jon pačaŭ z narakańnia na epochu miesiendžaraŭ i škadavańnia ab byłoj žyvoj kamunikacyi, a paśla chutka pierajšoŭ da palityčnaj temy.
Pavodle čynoŭnika, 2022 hod uvajšoŭ u historyju jak čarhovaja viacha ŭ raźvićci Biełarusi — i adbyłosia heta dziakujučy praviadzieńniu refierendumu pa źmienach u Kanstytucyju. Ivan Krupko miarkuje, što «absalutnaja bolšaść našych hramadzian padtrymała prapanavanyja papraŭki».
Nastupnaje pytańnie, jakoje padniaŭ kiraŭnik Homielščyny, — sankcyi ŭ dačynieńni da biełaruskaha režymu.
— Sankcyi i palityčny cisk zvonku vymusili ŭsich, chto sumniavaŭsia, pa-novamu zirnuć na našu Biełaruś: biaśpiečnuju, utulnuju, stabilnuju, duchoŭnuju, ciopłuju, sytuju, rodnuju. Da kožnaha kałaska ŭ poli, da kožnaj śniažynki, da kožnaha ahieńčyka ŭ aknie, da kožnaj dziciačaj ščaślivaj uśmieški.
Paśla Krupko pieraličyŭ dasiahnieńni rehijona:
— Žłobinskija mietałurhi vypłavili bolš jak 2 miljony stali, kambajny z łahatypam «Paleśsie» z hetaha hoda zajšli ŭ Zimbabve, Małavi i inšyja krainy afrykanskaha kantynienta. Naftaviki dasiahnuli rekordnaha za apošnija 20 hod pryrostu zdabyčy čornaha zołata — amal 1,8 młn ton — i adkryli novyja radoviščy.
Lida: «Hałoŭnaje, kab usie byli zdarovymi, a na našaj ziamli byŭ mir»
U hetym videa staršynia rajvykankama Siarhiej Łožačnik špacyruje pa lidskaj vulicy i piaščotna hladzić na miascovy handlovy centr. Usio heta adbyvajejcca pad liryčnuju muzyku. Paśla ŭ kadry źjaŭlajecca ŭpryhožanaja jełka z rajcentra, z adnoj sa śviatłodyjodnych arak vychodzić čynoŭnik — zatym jon apynajecca na katku, potym uvachodzić u budynak, raspranajecca kala jalinki i łaščyć trusa.
— Dni, hadziny, chviliny da novaha hoda zaŭsiody napoŭnienyja chvalavańniem: my zhadvajem źjavy minułaha hoda i byccam zdajom ekzamien na prava kročyć u budučyniu. U kožnaha z nas svajo, vielmi asabistaje staŭleńnie da taho, što było i što budzie, — raspačynaje jon.
Łožačnik vinšuje žycharoŭ i haściej Lidčyny sa śviatami i prapanuje ŭ navahodniuju noč pahladzieć u vočy blizkim.
— Za hod my papracavali niamała, kožny na svaim miescy, prymali śmiełyja rašeńni, ažyćciaŭlali idei, i ja ŭdziačny ŭsim, chto pražyŭ hety hod stvaralna, ź luboŭju. Daj boh nam sił, kab ažyćciavić usio zadumanaje. Kali my budziem dumać sučasna, tvorča stavicca da spravy, lubić dziaciej, my pieraadolejem usie vykliki, jakija kidaje nam žyćcio.
Siońnia my adpuskajem sychodziačy hod — hod histaryčnaj pamiaci. My budziem pomnić uroki minułaha zaŭsiody, z pavahaj stavicca da nacyjanalnych tradycyj, — adznačyŭ jon.
Taksama čynoŭnik nahadaŭ, što Lida ŭ 2023-m adznačyć 700-hadovy jubilej, i paabiacaŭ, što śviata budzie adznačacca pryhoža.
— Hałoŭnaje, kab usie byli zdarovymi, a na našaj ziamli byŭ mir, — zaviaršyŭ zvarot staršynia Lidskaha rajvykankama.
Hrodna: «Novy hod — heta cudy»
Kiraŭnik Hrodzienščyny Uładzimir Karanik taksama nie abminuŭ mahčymaści pavinšavać nasielnictva vobłaści. Videarad składzieny amal tak ža, jak i ŭ zvarocie staršyni Lidskaha rajvykankama: haradskija piejzažy, jakimi lubujecca čynoŭnik, vinšavańnie z vychadam z-pad śviatočnaj arki…
Spačatku Karanik pachvaliŭsia dasiahnieńniami rehijona: budaŭnictvam škoł i sadkoŭ, ustanoŭ achovy zdaroŭja i inšych, a paśla źviarnuŭsia da hramadzian. Pramova čynoŭnika była abciakalnaj i šabłonnaj.
— Novy hod — heta nadzieja, tamu treba spadziavacca, što samyja patajemnyja žadańni ździejśniacca, abaviazkova ździejśniacca. Novy hod — heta cudy, jakich čakajuć i darosłyja, i dzieci. I treba nie prosta čakać, a pavieryć, što my sami zdolnyja stvarać cudy — asabliva dla tych, kaho my lubim.
Čynoŭnik pažadaŭ svajoj aŭdytoryi znajści ŭ novym hodzie «niešta samaje kaštoŭnaje, nie ŭpuścić samaje važnaje, zdabyć najlepšaje i zachavać samaje darahoje».
— Dobraha zdaroŭja, miru, dabrabytu, harmonii i roskvitu, — zaklučyŭ jon.
Salihorsk: «Šachciorskaja stalica budzie sustrakać abłasnyja «Dažynki»
Andrej Žajłovič, staršynia Salihorskaha rajvykankama, źviarnuŭsia da hramadzian na fonie haradskoj jołki rajcentra.
Jon prapanavaŭ ziemlakam zhadać, jak mnoha jany zrabili ŭ minułym hodzie: raspavioŭ pra Hod histaryčnaj pamiaci i patryjatyčnyja prajekty, dabračynnaść, pośpiechi ŭ konkursach, baraćbu za ŭradžaj i aktyŭnaść u abmierkavańni kanstytucyi.
— Šachciorskaja stalica sustrenie ŭ novym hodzie jubilej — 65 hadoŭ — i budzie sustrakać na svajoj ziamli abłasny fiestyval «Dažynki», — padzialiŭsia hrandyjoznymi płanami na 2023-ci Žajłovič. — Maje być maštabnaja padrychtoŭka da hetych padziej, i ja vieru, što ŭ hetaj spravie my taksama prajavim svajo adzinstva i zhurtavanaść.
Naprykancy jon pažadaŭ žycharam rajona ažyćciaŭleńnia ŭsich mar, asabliva ŭ asabistym žyćci, a taksama zdaroŭja, ščaścia, lubovi, radaści, miru i dabrabytu.
Horki: «Sioleta my ŭvajšli ŭ trojku ŭ Mahiloŭskaj vobłaści pa ŭradžajnaści zbožža»
Staršynia Horackaha rajvykankama Michaił Huły ŭ svaim videazvarocie na fonie dziaržaŭnaha ściaha i navahodniaj jalinki adznačyŭ, što 2022 hod byŭ nasyčanym i na palityčnyja padziei, i na kulturnyja.
— My ŭsie z vami ŭdzielničali ŭ respublikanskim refierendumie, i žychary Horackaha rajona znoŭ paćvierdzili, što jany patryjoty, što jany sapraŭdnyja biełarusy — zrabili pravilny vybar, zhodna ź jakim buduć žyć budučyja pakaleńni, — skazaŭ miascovy čynoŭnik.
Druhaja važnaja padzieja, jakuju jon abaznačyŭ, — śviata «Vytoki. Krok da Alimpu», jakoje prachodziła ŭ tym liku ŭ Horackim rajonie. U hetym śviacie, pavodle staršyni vykankama, paŭdzielničała «masa ludziej».
— Nam jość čym hanarycca ŭ našym Horackim rajonie: paśpiachova spracavała naša ekanomika, my nie dapuścili jaje abvału. Nie vielmi časta našy ahraryi atrymlivajuć stabilnyja ŭradžai pa 100 tysiač ton zbožža — sioleta my ŭvajšli ŭ trojku ŭ Mahiloŭskaj vobłaści i ŭ 21 rajon u Respublicy Biełaruś, jakija pierasiahnuli płanku ŭ 100 tysiač, — adznačyŭ nievierahodnyja pośpiechi čynoŭnik.
Taksama Huły padziakavaŭ moładzi rajona za jaje dasiahnieńni i pažadaŭ ziemlakam zdaroŭja, dabrabytu i miru.
