«Ich da hetaha času vyciahvajuć z-pad abłomkaŭ». Žonka mabilizavanaha raspaviała pra abstreł PTV u Makiejeŭcy
Siarod mabilizavanych, jakija zahinuli ŭ akupavanaj Makiejeŭcy Danieckaj vobłaści, byli vajskoŭcy z Samarskaj vobłaści, paviedamiŭ hubiernatar rehijona Dźmitryj Azaraŭ. «Važnym historyjam» hetuju infarmacyju paćvierdzili svajački dvuch mabilizavanych, jakija znachodzilisia ŭ budynku PTV, što trapiŭ pad abstreł.
Adna z surazmoŭnic, čyj mabilizavany muž byŭ dysłakavany ŭ makiejeŭskim PTV, raspaviała, što jamu ŭdałosia vybiehčy z budynka paśla taho, jak tudy trapiŭ pieršy snarad, a ŭsiaho trapleńniaŭ było čatyry. Pavodle jaje słoŭ, u PTV znachodzilisia vajskoŭcy z dvuch pałkoŭ, 44-ha i 45-ha.
Žančyna śćviardžaje, što infarmacyja pra 63 zahinułych ad rasijskaha Minabarony niapravilnaja: «Zahinuła našmat bolš. Ich da hetaha času vyciahvajuć z-pad abłomkaŭ». «Jak tolki jany pryjechali tudy, adrazu stali snarady prylatać pobač. Moža, miascovyja žychary [zdali raźmiaščeńnie]. Jany tam atrutaj dychali na ich», — raspaviała jana.
Jašče adna žančyna, čyj syn byŭ dysłakavany ŭ PTV, raspaviała, što vyratavacca ŭdałosia artylerystam: «Jany ŭ padvalnym pamiaškańni byli, paśpieli vybiehčy». Jaje synu ŭdałosia vyratavacca, bo ŭ momant udaru jon sa svaim uzvodam nie znachodziŭsia na terytoryi PTV. Pa słovach žančyny, u budynku było kala 400 čałaviek — z ulikam uzvoda, jaki pakinuŭ PTV.
«Mazhi z čaravikaŭ zdymajem», — pieradała jašče adna surazmoŭnica «Važnych historyj» słovy svajho muža, jaki paśla mabilizacyi byŭ dysłakavany ŭ Makiejeŭcy. Jašče dźvie žančyny paćvierdzili, što ich svajaki z 44-ha pałka dysłakavanyja ŭ Makiejeŭcy, ale nie ŭdakładnili, ci znachodzilisia mužčyny ŭ budynku PTV.
Uviečary 1 studzienia prarasijski vajskovy błohier Uładzimir Ramanaŭ napisaŭ, što ŭ budynku PTV raźmiaščalisia mabilizavanyja z Sarataŭskaj vobłaści. U paniadziełak jon paviedamiŭ pra 200 zahinułych.
Pa danych rasijskaha Minabarony, u vyniku ŭdaru pa Makiejeŭcy zahinuli 63 vajennych. Upraŭleńnie stratehičnych kamunikacyj USU paviedamlała ab prykładna 400 zabitych i 300 paranienych i vykładvała videa nastupstvaŭ abstrełu.
