«Іх да гэтага часу выцягваюць з-пад абломкаў». Жонка мабілізаванага распавяла пра абстрэл ПТВ у Макееўцы
Сярод мабілізаваных, якія загінулі ў акупаванай Макееўцы Данецкай вобласці, былі вайскоўцы з Самарскай вобласці, паведаміў губернатар рэгіёна Дзмітрый Азараў. «Важным гісторыям» гэтую інфармацыю пацвердзілі сваячкі двух мабілізаваных, якія знаходзіліся ў будынку ПТВ, што трапіў пад абстрэл.
Адна з суразмоўніц, чый мабілізаваны муж быў дыслакаваны ў макееўскім ПТВ, распавяла, што яму ўдалося выбегчы з будынка пасля таго, як туды трапіў першы снарад, а ўсяго трапленняў было чатыры. Паводле яе слоў, у ПТВ знаходзіліся вайскоўцы з двух палкоў, 44-га і 45-га.
Жанчына сцвярджае, што інфармацыя пра 63 загінулых ад расійскага Мінабароны няправільная: «Загінула нашмат больш. Іх да гэтага часу выцягваюць з-пад абломкаў». «Як толькі яны прыехалі туды, адразу сталі снарады прылятаць побач. Можа, мясцовыя жыхары [здалі размяшчэнне]. Яны там атрутай дыхалі на іх», — распавяла яна.
Яшчэ адна жанчына, чый сын быў дыслакаваны ў ПТВ, распавяла, што выратавацца ўдалося артылерыстам: «Яны ў падвальным памяшканні былі, паспелі выбегчы». Яе сыну ўдалося выратавацца, бо ў момант удару ён са сваім узводам не знаходзіўся на тэрыторыі ПТВ. Па словах жанчыны, у будынку было каля 400 чалавек — з улікам узвода, які пакінуў ПТВ.
«Мазгі з чаравікаў здымаем», — перадала яшчэ адна суразмоўніца «Важных гісторый» словы свайго мужа, які пасля мабілізацыі быў дыслакаваны ў Макееўцы. Яшчэ дзве жанчыны пацвердзілі, што іх сваякі з 44-га палка дыслакаваныя ў Макееўцы, але не ўдакладнілі, ці знаходзіліся мужчыны ў будынку ПТВ.
Увечары 1 студзеня прарасійскі вайсковы блогер Уладзімір Раманаў напісаў, што ў будынку ПТВ размяшчаліся мабілізаваныя з Саратаўскай вобласці. У панядзелак ён паведаміў пра 200 загінулых.
Па даных расійскага Мінабароны, у выніку ўдару па Макееўцы загінулі 63 ваенных. Упраўленне стратэгічных камунікацый УСУ паведамляла аб прыкладна 400 забітых і 300 параненых і выкладвала відэа наступстваў абстрэлу.
